Navi Mumbai : ड्रग्स विक्री करणाऱ्या महिलेच्या घरावर बुलडोझर फिरवला, नवी मुंबई पोलिसांची मोठी कारवाई

विकास मिरगणे, नवी मुंबई

नवी मुंबईतून मोठी बातमी समोर आली आहे. नवी मुंबई पोलिसांनी ड्रग्स विक्री करणाऱ्या महिला आरोपी शांताबाई करंडकर (वय ५८) यांच्या घरावर तोडक कारवाई सुरू केली आहे. अवैध धंदे करून शांताबाईने ३२ लाखांचे घर घेतले होते. दरम्यान या घरावर आता कारवाई करण्यात आली असून ड्रग्स विरोधातील कारवाई प्रकरणातील हे मोठं पाऊल असल्याचं म्हटलं जात आहे

मिळालेल्या माहितीनुसार, शांताबाईला मागील वर्षी नोव्हेंबरमध्ये लाखो रुपयांच्या अमली पदार्थांसह अटक करण्यात आली होती.तिच्या विरोधात मकोका अंतर्गत गुन्हा दाखल करण्यात आला होता. तपासादरम्यान पोलिसांना धक्कादायक माहिती मिळाली की, तिने ड्रग्सच्या पैशातून मोठ्या प्रमाणावर मालमत्ता उभी केली होती.

या अवैध कमाईतून शांताबाईने नवी मुंबईतील दिघा परिसरात सुमारे ३२ लाख रुपयांचे घर खरेदी केले होते. त्यानंतर या घरावर दोन मजली बांधकामही करण्यात आले होते. मात्र, हे बांधकाम नियमबाह्य असल्याचे समोर आले. याबाबत सिडको प्रशासनाने तिला यापूर्वीच नोटीस बजावून जागा रिकामी करण्याचे आदेश दिले होते. तरीही कोणतीही कारवाई न झाल्याने अखेर पोलिसांनी पुढाकार घेत ही कठोर पावले उचलली.

सध्या शांताबाई कारागृहात असल्यामुळे तिच्या कुटुंबीयांनी घर रिकामे करण्यास टाळाटाळ केली होती. त्यामुळे बुधवारी सकाळी पोलिसांनी मोठा बंदोबस्त ठेवून घटनास्थळी धडक दिली. सर्वप्रथम घरातील रहिवाशांना बाहेर काढण्यात आले. तसेच, भाडेकरूंना तात्पुरत्या स्वरूपात जवळील मंदिरात हलवण्यात आले. यानंतर बुलडोझरच्या सहाय्याने संपूर्ण बेकायदेशीर बांधकाम जमीनदोस्त करण्यात आले. या कारवाईदरम्यान परिसरात मोठ्या प्रमाणावर पोलीस बंदोबस्त तैनात करण्यात आला होता, जेणेकरून कोणताही अनुचित प्रकार घडू नये.

नवी मुंबई शहरात ड्रग्स विक्रेत्याच्या मालमत्तेवर अशा प्रकारची ही पहिलीच मोठी कारवाई मानली जात आहे. या पावलामुळे ड्रग्स व्यवसायात गुंतलेल्या व्यक्तींना कडक इशारा मिळाला आहे. भविष्यातही अशाच प्रकारे कारवाई सुरू राहणार असल्याचे संकेत पोलिसांनी दिले असून, शहरात कायदा व सुव्यवस्था राखण्यासाठी प्रशासन अधिक कठोर भूमिका घेणार असल्याचे स्पष्ट झाले आहे.