नानासाहेब गायकवाड आणि पुत्राला 27 ऑगस्ट पर्यंत पोलिस कोठडी

पुणे: पुण्यातले प्रसिद्ध उद्योगपती नानासाहेब गायकवाड आणि त्यांचा मुलगा गणेश गायकवाड यांना २७ ऑगस्ट पर्यंत पोलिस कोठडी ठोठावण्यात आली आहे. काल अखेर दीड महिना शोध घेतल्यानंतर पुणे पोलिसांनी वेगवेगळ्या गुन्ह्यांमध्ये त्यांना अटक केली होती. गणेश गायकवाड याने त्याची पत्नी आणि राष्ट्रवादीचे सोलापूरचे नेते दीपक आबा साळुंखे यांच्या मुलीला सिगारेटचे चटके देऊन मारहाण करून कौटुंबिक छळ केल्याप्रकरणी पहिला गुन्हा चतुर्श्रुंगी पोलिस ठाण्यात दाखल झाला होता.

यानंतर गणेश गायकवाड नानासाहेब गायकवाड यांच्यावर पुणे आणि पिंपरी-चिंचवड पोलीस ठाण्याच्या हद्दीत वेगवेगळ्या पोलिस ठाण्यांमध्ये खंडणी, बलात्कार जीवे मारण्याची धमकी असे अनेक गंभीर गुन्हे दाखल झाले होते. त्यानंतर पुणे आणि पिंपरी-चिंचवड पोलिसांनी बाप लेकांसह आणखी दोघांवर मोकाची कारवाई केलेली होती.

तेव्हापासून गेले दीड महिना गणेश गायकवाड आणि नानासाहेब गायकवाड हे दोघेही फरारी होते. त्यांच्या मागावर पुणे पोलिसांची अनेक पथके काम करत होती अखेरीस त्यांना काल कर्नाटक मधून अटक केली होती. आज त्यांना न्यायालया समोर हजर करण्यात आले. त्यात त्यांना २७ ऑगस्ट पर्यंत पोलीस कोठडी ठोठावण्यात आली आहे. नानासाहेब गायकवाड हे चिंचवड चे भाजप आमदार लक्ष्मण जगताप यांचे सख्खे मावस भाऊ आहेत.

Edited By: Pravin Dhamale