Mumbai Crime : धक्कादायक! फक्त ४०० मीटरसाठी घेतले ₹१८०००, अमेरिकन महिलेला मुंबईच्या टॅक्सी चालकानं लुबाडलं

मुंबई ही स्वप्ननगरी आहे. या स्वप्ननगरीत दररोज अनेक जण वेगवेगळ्या कारणांसाठी येत असतात. परराज्यातून येणारे नागरिक मुंबईत पर्यटन करण्यासाठी आग्रही असतात. मात्र याच मुंबईत बाहेरगावावरून आलेल्या पर्यटकांची लूटमार होत असल्याची घटना सातत्याने समोर येत आहेत. अशीच एक घटना अमेरिकेहून मुंबईत आलेल्या महिलेसोबत घडली आहे. एका टॅक्सी चालकाने थोड्या थोडक्या अंतरासाठी शे दोनशे नाही तर तब्बल १८ हजार रुपये घेतले असल्याचा संतापजनक प्रकार घडला आहे.

मिळालेल्या माहितीनुसार, अमेरिकेतून मुंबईत आलेल्या महिलेने छत्रपती शिवाजी महाराज आंतरराष्ट्रीय विमानतळावरून ४०० मीटर अंतरावर असलेल्या एका हॉटेल पर्यंत जाण्यासाठी टॅक्सी बुक केली. या टॅक्सीत बसून संबंधित महिला ठरलेल्या ठिकाणी उतरली. त्यानंतर तिच्यासोबत जे घडलं ते संतापजनक होतं. टॅक्सी चालकाने या महिलेकडून भाडे घेताना १००,२०० नाही तर तब्बल १८ हजार रुपये भाडे घेतले.

यानंतर या महिलेने सोशल मीडियावर तिचा हा अनुभव शेअर केला. या घटनेची दखल घेत मुंबई पोलिसांनी या टॅक्सी चालकाचा शोध घेतला. शिवाय त्याला अमेरिकन महिलेकडून १८,००० रुपये आकारल्याच्या आरोपाखाली आणि फसवणूक केल्याप्रकरणी अटक करण्यात आली आहे.पोलिसांच्या म्हणण्यानुसार, टॅक्सी ड्रायव्हरने महिलेला हॉटेलमध्ये सोडण्यापूर्वी काही ठिकाणी गाडी फिरवली आणि जास्त भाडे मागितले.

दरम्यान या प्रकरणी आरोपी चालकाला अटक करण्यात आली आणि तपासाचा भाग म्हणून वाहन जप्त करण्यात आले आहे. अधिकाऱ्यांनी सांगितले की, पुढील चौकशी सुरू आहे. तसेच मुंबईत येणाऱ्या पर्यटकांसोबत पुन्हा असा अनुचित प्रकार घडणार नाही याची काळजी घेणार असल्याचे मुंबई पोलिसांनी म्हटले आहे.