Shocking: मुंबईत स्पीकर अंगावर पडून चिमुकलीचा मृत्यू, प्रजासत्ताक दिनाच्या कार्यक्रमादरम्यान भयंकर घडलं; थरारक VIDEO समोर

Summary -

• विक्रोळी टागोरनगरमध्ये प्रजासत्ताक दिनाच्या कार्यक्रमादरम्यान मोठी दुर्घटना

• स्पीकर अंगावर पडून ३ वर्षीय चिमुकलीचा दुर्दैवी मृत्यू

• संपूर्ण घटना सीसीटीव्हीमध्ये कैद

• पोलिसांनी गुन्हा दाखल करत तपास सुरू केला

मयूर राणे, मुंबई

मुंबईत प्रजासत्ताक दिनाच्या कार्यक्रमादरम्यान भयंकर घटना घडली. कार्यक्रमासाठी लावण्यात आलेला स्पीकर अंगावर पडून एका ३ वर्षीय मुलीचा दुर्दैवी मृत्यू झाला. ही मन सुन्न करणारी घटना विक्रोळीतील टागोरनगर भागात घडली. या घटनेचा सीसीटीव्ही व्हिडीओ समोर आला असून तो व्हायरल होत आहे. या घटनेमुळे विक्रोळी परिसरात हळहळ व्यक्त केली जात आहे.

मिळालेल्या माहितीनुसार, विक्रोळी टागोरनगरच्या आंबेडकर नगरमध्ये ही भयंकर घटना घडली. प्रजासत्ताक दिनानिमित्त याठिकाणी कार्यक्रमाचे आयोजन करण्यात आले होते. या कार्यकमासाठी रस्त्याच्या कडेला दोन स्पीकर लावण्यात आले होते. संपूर्ण परिसरात आनंदाचे वातावरण होते. रस्त्यावर लहान मुलं देखील खेळत होती. याच दरम्यान घराबाहेर खेळत असलेली मुलगी पळत जात असताना अचानक तिच्या अंगावर स्पीकर पडतो आणि तिचा मृत्यू होतो.

चिंधीवाल्याच्या चुकीमुळे स्पीकर कोसळल्याचा आरोप स्थानिकांनी केला आहे. स्पीकर अंगावर पडून ३ वर्षांची मुलगी गंभीर जखमी झाली. उपचारासाठी तिला तात्काळ रुग्णालयात नेण्यात आले पण डॉक्टरांनी तिला मृत घोषीत केले. या प्रकरणी विक्रोळी पोलिस ठाण्यात गुन्हा दाखल करण्यात आला असून घटनेचा पुढील तपास पोलिसांकडून सुरू आहे.

ही संपूर्ण घटना सीसीटीव्ही कॅमेऱ्यात कैद झाली आहे. हा व्हिडीओ व्हायरल होत आहे. या व्हिडीओमध्ये दिसत आहे की, एक व्यक्ती त्या स्पीकरच्या जवळ जातो. स्टँडवर लावलेल्या स्पीकरला किंवा त्याच्या वायरला धक्का लागतो आणि तो स्पीकर खाली पडतो. त्याचवेळी त्याठिकाणावरून चिमुकली पळत जात असते. त्या चिमुकलीच्या अंगावर स्पीकर पडतो. या मुलीच्या काकांचा मुलगा तिला पटकन उचलून घेतो आणि रुग्णालयात घेऊन जातो. पण तोपर्यंत उशिर होता. या मुलीचा या घटनेत दुर्दैवी मृत्यू झाला. पोलिस सध्या सीसीटीव्ही फुटेजच्या आधारे तपास करत आहेत.