Andheri Subway Closed For Traffic: मुंबईत मुसळधार पाऊस, ठिकठिकाणी साचले पाणी; अंधेरी सबवे वाहतुकीसाठी बंद

संजय गडदे, मुंबई

Mumbai News: मुंबईमध्ये सकाळपासून मुसळधार पाऊस (Mumbai heavy Rainfall)पडत आहे. या पावसामुळे मुंबईतील सखल भागांमध्ये पाणी साचायला सुरुवात झाली आहे. अशामध्ये अंधेरी सबवे (Andheri Sub-Way) देखील पाण्याने भरला आहे. याठिकाणी चार ते पाच फूटांपर्यंत पाणी साचले आहे. वाहतूक पोलिसांनी बॅरिगेट्स लावून अंधेरी सबवे वाहतुकीसाठी बंद केला आहे. याठिकाणावरुन एकाही प्रवाशाला जाऊन दिले जात नाहीये.

मिळालेल्या माहितीनुसार, हवामान खात्याने मुंबईमध्ये आज ऑरेंज अलर्ट जारी केला आहे. आज सकाळपासून मुंबईमध्ये मुसळधार पाऊस सुरु आहे. मागील एका तासापासून मुसळधार पावसाने मुंबईला झोडपून काढले आहे. यामुळे मुंबईतील सखल भागांमध्ये पाणी साचले आहे. काही ठिकाणी रस्त्यांना नद्याचे स्वरुप आले आहे. या पवासामुळे मुंबईतील रस्त्यांवर वाहतूक कोंडी झाली आहे. यामुळे नागरिकांना आणि वाहन चालकांना मोठ्या अडचणीचा सामना करावा लागत आहे.

अंधेरी पूर्व आणि पश्चिमेला जोडणारा सध्याचा एकमेव मार्ग म्हणजे अंधेरी सबवे हा देखील पाण्याने संपूर्ण भरलेला आहे. या ठिकाणी साधारणपणे चार ते पाच फूट इतके पाणी साचले आहे. सुरक्षेच्या कारणास्तव वाहतूक पोलिसांनी हा मार्ग वाहतुकीसाठी बंद केला आहे. याठिकाणावरुन ये -जा करणाऱ्या वाहन चालक आणि नागरिकांना बंदी घालण्यात आली आहे. त्यामुळे आता अंधेरी पूर्वेकडे जाण्यासाठी वाहन चालकांना कॅप्टन गोरे पूल आणि ठाकरे उड्डाणपुलाचा वापर करण्याच्या सूचना वाहतूक पोलिसांनी दिल्या आहेत.