Mumbai Pune Highway : मुंबई-पुणे प्रवास फक्त दीड तासात! तिसरा महामार्गाला होणार सुरूवात, ट्रॅफिकचा प्रश्न कायमचा सुटणार

Mumbai Pune New Highway : मुंबईवरुन पुण्याला जाण्यासाठी आता नवीन महामार्गाचा पर्याय उपलब्ध होणार आहे. तिसऱ्या महामार्गामुळे मुंबई-पुणे प्रवास अधिक सुखकर होणार आहे. यामुळे वाहतूककोंडीचा मोठा प्रश्न मार्गी लागेल असे म्हटले जात आहे. एनएचएआय म्हणजेच भारतीय राष्ट्रीय महामार्ग प्राधिकरणाद्वारे पुणे- बंगळुरू द्रुतगती महामार्गाचे काम सुरु आहे. हा महामार्ग मुंबईपर्यंत विस्तारित केला जाणार आहे.

मुंबई-पुणे-बंगळुरू या ८३० किमी लांब द्रुतगती प्रकल्पाचे काम राष्ट्रीय महामार्ग प्राधिकरणाने सुरु केले आहे. पुणे-बंगळुरू महामार्गाचे काम सुरु असताना प्राधिकरणाने मुंबई–पुणे महामार्गातील पागोटे चौक ते २९.१२९ किमीपर्यंतच्या भागाचा आराखडा तयार झाला आहे. चौक-पुणे, शिवारे या सुमारे १०० किमी लांब टप्प्याचा आराखडा तयार करण्याचे कामही सुरु आबे. दुसऱ्या बाजूला पागोटे-चौक टप्प्याच्या कामासाठी दिवाळीनंतर निविदा काढली जाणार आहे. डिसेंबर २०२५ अखेरीस निविदा अंतिम करुन नव्या वर्षात महामार्गाच्या बांधकामाला सुरुवात होईल.

पागोटे-चौक आणि चौक-पुण, शिवारे हा महामार्गाचा भाग तयार झाल्यावर मुंबई-पुणे प्रवासासाठी तिसरा द्रुतगती महामार्ग तयार होईल. या तिसऱ्या आणि नव्या महामार्गामुळे सध्याच्या मुंबई-पुणे महामार्गावरील ताण कमी होईल. याशिवाय वाहतूक कोंडीचा त्रासही कमी होईल. या तिसऱ्या द्रुतगती महामार्गामुळे मुंबई-पुणे प्रवास फक्त दीड तासांमध्ये पूर्ण करता येईल.

भारतीय राष्ट्रीय महामार्ग प्राधिकरणाच्या या नव्या महामार्गाच्या प्रकल्पासाठी सुमारे ३६५२ कोटी रुपयांचा खर्च अपेक्षित आहे. या प्रकल्पाअंतर्गत रायगड जिल्ह्याच्या तीन तालुक्यांमधील १७५.९४ हेक्टर जागा संपादित करण्याचे काम सुरु आहे. यापैकी ६० टक्के काम पूर्ण झाले आहे. पुढील काही महिन्यात भूसंपादन संपूर्ण काम पूर्ण करण्याचे नियोजन आहे, अशी माहिती राष्ट्रीय महामार्ग प्राधिकरणाच्या अधिकाऱ्यांनी दिली आहे.