Aryan Khan Case: मुंबई पोलीस नोंदविणार खंडणीचा गुन्हा?

मुंबई: आर्यन खान अटकेप्रकरणी खंडणी वसुलीचा डाव होता असा आरोप राष्ट्रवादीचे नेते नवाब मलिक यांनी केल्यानंतर मोठा वाद निर्माण झाला होताय याच प्रकरणात आता मुंबई पोलिस अॅक्शन मोडमध्ये आले आहेत. तथाकथित खंडणीविरोधात मुंबई पोलिसांच्या एसआयटी टीमकडून खंडणीचा गुन्हा नोंदवण्याच्या हालचाली वाढल्या आहेत. त्यामुळे आर्यन खान प्रकरणात लवकरच खंडणीचा गुन्हा दाखल होऊ शकतो.

हे देखील पहा -

शाहरुख खानची मॅनेजर पूजा ददलानी यांना तीन दिवसांपूर्वी समन्स बजावण्यात आले होते. मात्र प्रकृतीचे कारण सांगून त्या चौकशीसाठी हजर झालेल्या नव्हत्या. पूजा ददलानीचा जबाब नोंद होत नसल्यामुळे गुन्हा नोंद होण्यात अडचणी निर्माण होत आहेत. कारण पुजा ददलानी ह्याच त्यावेळी घटनास्थळी उपस्थित होत्या त्यामुळे त्यांच्या जबाबाशिवाय खंडणीचा गुन्हा पोलिसांना थेट घेता येत नसल्याचे सूत्राकडून सांगण्यात येत आहे.

जर पूजा ददलानी त्यांचा जबाब नोंदवायला आल्या नाही तर, मुंबई पोलिस कायदेशीर मत घेऊन या प्रकरणी सुओमोटो एफआयआर करायचा की नाही याचा निर्णय घेतील. आतापर्यंतच्या तपासात समीर वानखेडे किंवा एनसीबीच्या कोणत्याही अधिकाऱ्याचा थेट संबंध सिद्ध झालेला नाही. मुंबई पोलिसांनी आतापर्यंत १५ जणांचे जबाब नोंदवले आहेत तसेच मुंबई पोलिसांनी सॅम डिसोझा यांनाही समन्स बजावले आहे.

Edited By - Akshay Baisane