Aarey to BKC Metro : आरे ते बीकेसी मेट्रो धावणार! तिकीट फक्त 10 रुपये, कुठे थांबणार, कधी होणार सुरू? जाणून घ्या संपूर्ण माहिती

गिरीश कवडे, साम टीव्ही, प्रतिनिधी

Mumbai Metro 3's Aarey Colony to Bkc Line to Be Inaugurated Soon: मुंबईकरांसाठी एक अत्यंत आनंदाची बातमी आहे. मुंबईत लवकरच भूमिगत मेट्रो धावणार आहे. ही मेट्रो सेवा आरे ते बीकेसीदरम्यान सुरू होणार आहे. यामुळे पश्चिम रेल्वेने प्रवास करणाऱ्यांना मोठा दिलासा मिळणार आहे. तसेच नोकरीसाठी बीकेसीला येणाऱ्यांची वाहतुकीच्या समस्येतून सुटका होणार आहे.

मेट्रो 3 मार्गाची मुंबईकर आतुरतेने वाट पाहत होते. या मेट्रो लाईनचे काम पूर्ण झालं असून याच उद्घाटनही पुढील महिन्यात होऊ शकते. याचबद्दल मुंबई मेट्रो रेल कॉर्पोरेशन लिमिटेडच्या (एमएमआरसीएल) एमडी अश्विनी भिडे यांनी आज आयोजित पत्रकार परिषदेत अधिक माहिती दिली आहे.

किती असणार स्टेशन, कधी होणार सुरू?

माध्यमांशी संवाद साधताना अश्विनी भिडे म्हणाल्या आहेत की, ''मुंबई मेट्रो 3 चा पहिला टप्पा आरे ते बीकेसीपर्यत आहे. मुंबईतील संपूर्ण भूमिगत ही मेट्रो 3 असणार आहे, आरेपासून बीकेसीदरम्यान याचे 10 स्टेशन आहेत. ऑक्टोबरच्या पहिल्या आठवड्यात ही लाईन सुरु होईल. काही डॉक्युमेंटेशन सुरु आहे, त्यानुसार पहिल्या आठवड्यात सुरु होईल, असा आमचा अंदाज आहे.''

किती असेल तिकीट भाडं?

नवीन मेट्रोच्या तिकीट भाड्याबद्दल माहिती देताना अश्विनी भिडे म्हणाल्या की, ''याचे दरदिवशी 96 ट्रिप होणार आहेत. या लाईनवर एकूण 9 गाड्या सकाळी 6 ते रात्री 10 पर्यंत धावणार. यामध्ये 48 ट्रेन कॅप्टन आहेत. त्यापैकी 10 महिला आहेत. तिकीट दर पहिल्या टप्प्यासाठी कमीत कमी 10 रुपये असणार आहे आणि जास्तीत जास्त 50 रुपये असेल. ट्रेनचं काम पूर्ण होईल तेव्हा तिकीटचे दर जास्तीत जास्त 70 रुपये असेल.''

अधिक माहिती देताना अश्विनी भिडे यांनी सांगितलं की, ''या मेट्रोचा फेज दोन हा मार्च ते मेपर्यंत पूर्ण होईल, असा आमचा अंदाज आहे. या टप्यात मोठं मोठी स्थानक आहेत, त्यामध्ये वरळी आणि गिरगांव येथे मोठी आव्हान आहेत. बीकेसी ते कफ परेड हा टप्पा मार्च ते एप्रिल 2025 पर्यत पूर्ण करण्याचा प्रयत्न आहे. वरळी नाका आणि गिरगांव स्टेशन ही चॅलेंजिंग स्टेशन आहेत. त्यांचे काम जर डिसेंबरपर्यत झाली, तर पूर्ण मेट्रोचं पुढचं काम हे मार्च 2025 पर्यत पूर्ण होईल.