Crime: बाप बनला हैवान! झोपलेल्या मुलीच्या गळ्यावरून ब्लेड फिरवलं, नंतर बायकोवर चाकू हल्ला; मुंबई हादरली

Summary -

• मुंबईत बापाने मुलीच्या गळ्यावरून ब्लेड फिरवत हत्या करण्याचा प्रयत्न केला

• मुलीला वाचवण्यासाठी आलेल्या बायकोवर आरोपीने चाकूने हल्ला केला

• या हल्ल्यात आई आणि मुलगी दोघी गंभीर जखमी झाल्या आहेत

• दोन्ही जखमींवर शताब्दी रुग्णालयात उपचार सुरू आहेत

मुंबईमध्ये मन सुन्न करून टाकणारी घटना समोर आली आहे. या ठिकाणी एका व्यक्तीने आपल्या १४ वर्षांच्या मुलीची हत्या करण्याचा प्रयत्न केला. त्याने झोपलेल्या मुलीच्या गळ्यावरून ब्लेड फिरवले. मुलीचा ओरडण्याचा आवाज ऐकून तिला वाचवण्यासाठी आलेल्या आईवर देखील आरोपीने हल्ला केला. या हल्ल्यात मुलगी आणि तिची आई गंभीर जखमी झाली आहे. तिच्यावर रुग्णालयात उपचार सुरू आहेत.

मिळालेल्या माहितीनुसार, हनुमंत सोनावणे ( ३६ वर्षे) असं आरोपीचे नाव आहे. आरोपी आपल्या कुटुंबीयांसोबत मुंबईत राहतो. दारूच्या नशेमध्ये घरी येऊन आरोपीने आधी मुलीवर हल्ला केला. गाढ झोपेत असलेल्या मुलीच्या गळ्यावरून त्याने ब्लेड फिरवलं. मुलगी जोरजोरात ओरडू लागली. तिच्या रडण्याचा आवाज ऐकून तिला वाचवण्यासाठी तिची आई आली. यावेळी आरोपीने बायकोवर देखील हल्ला केला. या हल्ल्यात पीडित मुलीच्या गळ्याला टाके पडले तर तिची आई देखील जखमी झाली. दोघींवर कांदिवलीच्या शताब्दी रुग्णालयात उपचार सुरू आहेत.

आरोपी बेरोजगार असून त्याला दारूचे व्यसन लागले आहे. बायकोचे विवाहबाह्य संबंध असल्याचा संशय त्याला होता. यावरून तो सतत तिला आणि मुलीला मारहाण करत होता. दोघांमध्ये सतत भांडणं व्हायची. दारूच्या नशेत असताना बुधवारी सकाळी आरोपीने झोपेत असलेल्या मुलीची हत्या करण्याचा प्रयत्न केला. मुलीच्या गळ्यावर त्याने ब्लेड फिरवले. त्यानंतर मुलीच्या बचावासाठी आलेल्या आईच्या पोटात चाकू भोसकला.

याप्रकरणी आरोपीविरोधात हत्येचा प्रयत्न करण्यात आल्याप्रकरणी गुन्हा दाखल करण्यात आला आहे. पोलिसांनी आरोपीला अटक केली आहे. आरोपी आणि त्याच्या बायकोचा घटस्फोट घेण्याची प्रक्रिया सुरू आहे. यामुळेच तो चिंतेत होता. तर जखमी झालेल्या त्याच्या बायको आणि मुलीवर रुग्णालयात उपचार सुरू आहेत. या घटनेमुळे मुंबईत खळबळ उडाली.