Mumbai : फ्लॅट देण्याचं आमिष दाखवून कोट्यवधींना लुटलं, मुंबईतील बड्या बिल्डरचा कारनामा उघड

संजय गडदे, मुंबई

बोरिवली (पूर्व) परिसरातील नागरिकांची आणि गुंतवणूकदारांची कोट्यवधी रुपयांची फसवणूक करणाऱ्या त्रिवेणी डेव्हलपर्सचे बिल्डर पिता–पुत्र या दोघांना पोलिसांनी बेड्या ठोकल्या आहेत. मिहीर जेठवा आणि अशोक जेठवा यांना कस्तुरबा मार्ग पोलिसांनी केरळमधून शिताफीने ताब्यात घेतले. कस्तुरबा मार्ग पोलीस ठाणे बोरिवली पोलीस ठाणे आणि एम एस बी या तीन ठिकाणी या दोघा पिता पुत्रांविरोधात एकूण दहा गुन्हे नोंद आहेत.दोघेही मागील दोन वर्षांपासून फरार होते.

फिर्यादी नवीनचंद्र गोरधनदास भरखडा (69) यांनी 31 मार्च 2019 ते 31 मार्च 2020 दरम्यान 2% मासिक परतावा आणि बोरिवलीतील न्यू शिवकृपा CHS मध्ये फ्लॅट देण्याचे खोटे आश्वासन देत 1 कोटी 17 लाख रुपये घेतल्याची तक्रार दाखल केली होती. पैसे परत न करता फसवणूक केल्याप्रकरणी गु.र.क्र. 177/2025 अन्वये जेठवा कुटुंबाविरोधात गुन्हा दाखल झाला होता.

तांत्रिक तपास, बातमीदारांची माहिती आणि सततच्या पाठपुराव्यामुळे आरोपी केरळातील एर्नाकुलम जिल्यात वेगवेगळ्या ठिकाणी नाव बदलून राहत असल्याचे समोर आले. वरिष्ठ पोलीस निरीक्षक जयराज रणवरे यांच्या मार्गदर्शनाखाली सपोनि राहुल पाटील, सरला थोरात व पथकाने कोची येथे सापळा रचून दोन्ही आरोपींना अटक केली.

आरोपींवर कस्तुरबा मार्ग व बोरीवली पोलीस ठाण्यात फसवणूक, विश्वासघात, धमकी, मोफा कायदा उल्लंघन, ठेवीदार संरक्षण अधिनियम आदी कलमांखाली एकूण १० हून अधिक गंभीर गुन्हे दाखल आहेत. तसेच न्यायालयाने जारी केलेली अटक वॉरंटदेखील प्रलंबित होती.

ही कारवाई पोलीस उप आयुक्त महेश चिमटे, सपोआ मालोजी शिंदे यांच्या मार्गदर्शनाखाली करण्यात आली. कस्तुरबा मार्ग पोलिसांनी केलेल्या या धडक कारवाईमुळे गुंतवणूकदारांची मोठी फसवणूक करणाऱ्या बिल्डरांच्या टोळीचा पर्दाफाश झाला असून आणखी पीडित पुढे येण्याची शक्यता वर्तवली जात आहे.