Darshana Pawar Death Case : शेवटचं बोलायचं म्हणून राजगडावर नेलं, अन्... दर्शना पवारच्या हत्येचं धक्कादायक कारण आलं समोर

Pune News : एमपीएससी (MPSC) टॉपर दर्शना पवार हत्या प्रकरणाचं गूढ हळूहळू उलगडू लागलं आहे. दर्शना पवार हत्या प्रकरणी तिचा मित्र राहुल हांडोरेला पुणे पोलिसांनी मुंबईतून ताब्यात घेतलं आहे. दर्शनाची हत्या झाल्याच्या दिवसापासून राहुल गायब होता. त्याला पकडण्यासाठी पोलिसांनी पथकेही तयार केली होती.

राहुलला ताब्यात घेतल्यानंतर दर्शना पवारच्या हत्येचं कारणंही आता समोर आलं आहे. प्राथामिक तपासातील माहितीनुसार, राहुल हांडोरेला दर्शनासोबत लग्न करायचं होतं. मात्र एमपीएससी उत्तीर्ण होण्याआधीपासून दर्शनाच्या कुटुंबियांनी तिच्या लग्नासाठी मुले बघण्यास सुरुवात केली होती. यामुळे संतापलेल्या राहुलने तिची हत्या केली, अशी माहिती मिळत आहे.

शेवटचं बोलायचं म्हणून राजगडावर नेलं

दर्शना आणि राहुल दोघे नातेवाईक होते. दोघेही एकत्रच एमपीएससी परीक्षेचा अभ्यास करत होते. राहुलला आधीपासून दर्शनाशी लग्न करण्याची इच्छा होती. मात्र दर्शना आणि तिच्या घरच्यांनी लग्नाला नकार दिला होता.  (Pune News)

दर्शना हिचे दुसऱ्या मुलासोबत लग्नही ठरले होते. दर्शनाचं दुसऱ्या कुणाशीतरी लग्न होणार या विचाराने राहुल अस्वस्थ होता. यानंतर राहुलने दर्शनाला शेवटचे बोलायचे म्हणून राजगडवर नेले आणि दर्शनाचा खून केला, अशा प्राथमिक माहिती मिळत आहे. पुणे पोलीस याप्रकरणी दुपारी 12.30 वाजता पत्रकार परिषद घेणार आहेत.

राहुल हत्येच्या दिवसापासून गायब

दर्शना पवार तिचा राहुलसोबत १२ जूनला राजगडावर फिरायला गेली होती. मात्र जवळील हॉटेलच्या सीसीटीव्ही फूटेजमध्ये राहुल एकटाच राजगडावरुन खाली उतरताना दिसला होता. त्या दिवसापासून राहुल हांडोरे गायब होता. त्यामुले दर्शनाची हत्या राहुलनेच केल्याचा संशय पोलिसांना होता. त्याला पकडण्यासाठी पुणे पोलिसांनी पाच पथकंही तयार केले होते.