घरच्यांनी कपडे घेतले नाहीत म्हणून ५ लाख घेऊन अल्पवयीन मुलाचे पलायन!

मुंबई : घरच्यांनी हट्ट न पुरवल्याचा राग अनावर झाल्याने नांदेडहून पळून आलेल्या १५ वर्षाच्या मुलाला सायबर पोलिसांनी शर्थीचे प्रयत्न करून शोधले. हा मुलगा घरातल्यांनी कपडे घेतले नाहीत म्हणून रागात गावातील मित्रासह घरातून ५ लाख रुपये घेऊन मुंबईत (Mumbai) आला होता. ही मुले बेपत्ता झाल्याची तक्रार घरातल्यांनी नांदेड (Nanded) ग्रामीण पोलिस ठाण्यात केली.

हे देखील पहा :

तपासात ही मुलं मुंबईत आल्याचे कळाल्यानंतर नांदेड पोलिसांनी मुंबई सायबर पोलिसांकडे (Cyber Police) मदत मागितली. क्षणाचाही विलंब न करता सायबर पोलिस उपायुक्त रश्मी करंदीकर यांच्या मार्गदर्शनाखाली पोलिसांनी (Police) तपास सुरू केला. तपासाची चक्रे फिरली. दोन्ही मुलं मालाड दिंडोशी परिसरात असल्याची माहिती समोर आली. दोन्ही मुलांनी काही वेळ कुर्ला (Kurla) येथे घालवला.

त्यानंतर पून्हा ते मालाड (Malad) येथे आले. त्या ठिकाणी १ लाख २० हजाराचा आयफोन (iPhone) मोबाइल त्यांनी घेतला. अन्य खरेदीसाठी फिरत असताना, पोलिसांना दोघांचं लोकेशन ट्रेस झाल्यानंतर सायबर पोलिसांनी त्यांना ताब्यात घेतले. दोन्ही मुलांना सुखरूप नांदेड पोलिसांकडे सोपवले. सायबर पोलिसांच्या या कामगिरीचं कौतुक सध्या सर्वत्र सुरू आहे.

Edited By : Krushnarav Sathe