Ravindra Chavan News: मनसेच्या पदयात्रेआधीच मंत्री रवींद्र चव्हाण करणार मुंबई-गोवा महामार्गाची पाहणी; वर्षातील चौथा दौरा

सचिन कदम

Ravindra Chavan News

राज्याचे सार्वजनिक बांधकाम मंत्री रवींद्र चव्हाण आज मुंबई गोवा महामार्गाच्या कामाची पाहणी करून आढावा घेणार आहेत. या वर्षीच्या पावसातला हा त्यांचा चोथा पाहणी दौरा असून मनसेच्या गांधीगिरी आंदोलनाच्या पार्श्वभूमीवर चव्हाण यांचा हा दौरा महत्त्वाचा आहे. (Latest Marathi News)

मुंबई गोवा महामार्ग मार्गाचे काम गेली 12 वर्षे रखडले आहे. गणेशोत्सवापूर्वी या रस्त्याच्या एका लेनचे काम पूर्ण व्हावे यासाठी शासनाकडून जोरदार प्रयत्न सुरू आहेत. त्याकरिता CBT हे नवीन तंत्रज्ञान वापरले जात आहे. रवींद्र चव्हाण आज या तंत्रज्ञानावर आधारित कामाचा आढावा घेणार आहेत. यापूर्वी याच महिन्यात चव्हाण यांनी दोनवेळा महामार्गाच्या कामाची पाहणी केली होती.

दरम्यान, या रस्त्याचे काम लवकरात लवकर पूर्ण व्हावे यासाठी मनसेने आंदोलन पुकारले आहे. उद्या रविवारी 27 ऑगस्टला अमित ठाकरे यांच्या नेतृत्वाखाली पदयात्रा काढण्यात येणार असून संध्याकाळी कोलाड येथे राज ठाकरे यांच्या जाहीर सभेचे आयोजन करण्यात आले आहे.

उद्या होणारी अमित ठाकरे यांची पदयात्रा आणि राज ठाकरे यांची सभा या पार्श्वभूमीवर बांधकाम मंत्री रविंद्र चव्हाण यांचा आजचा दौरा महत्व पूर्ण आहे.

मुंबई-गोवा महामार्ग प्रश्नी मनसे आक्रमक

मुंबई गोवा महामार्ग पूर्ण होऊन सुलभ प्रवास करता यावा, याकरिता मनसे अध्यक्ष राज ठाकरे यांच्याकडून निर्धार मेळाव्याचेही आयोजन करण्यात आलं होतं. आता याच मुंबई गोवा महामार्ग प्रश्नी मनसेने आक्रमक भूमिका घेत अमित ठाकरे यांच्या नेतृत्वाखाली पदयात्रा काढली जाणार आहे. उद्या रविवारी 27 ऑगस्टला अमित ठाकरे यांच्या नेतृत्वाखाली पदयात्रा काढण्यात येणार आहे.