Manoj Jarange Patil: उद्यापासून पाणी पिणं बंद, कडक आमरण उपोषण सुरू; मनोज जरांगेंची घोषणा

Summary -

• मनोज जरांगे पाटील यांनी कडक आमरण उपोषणाची घोषणा केली.

• उद्यापासून ते पाणी पिणं बंद करणार आहेत.

• आझाद मैदानावर आरक्षणासाठी त्यांचे आमरण उपोषण सुरू आहे.

• आरक्षण मिळाल्याशिवाय मुंबई सोडणार नाही, असा निर्धार त्यांनी व्यक्त केला.

आरक्षणाच्या मागणीसाठी मुंबईतील आझाद मैदानावर आमरण उपोषणाला बसलेल्या मनोज जरांगे पाटील यांनी मोठी घोषणा केली आहे. 'उद्यापासून पाणी पिणं बंद करणार आहे. सोमवारपासून कडक आमरण उपोषण सुरू करणार आहे.', असे मनोज जरांगेंनी सांगितले. 'महाराष्ट्रातील मराठ्यांनी कुणालाही १ रूपयाही देऊ नये. वाटपाच्या नावाखाली एकही रुपया द्यायचा नाही किंवा कमवायचा नाही.', असे आवाहन मनोज जरांगे पाटील यांनी मराठा आंदोलकांना केले आहे.

आरक्षण मिळाल्याशिवाय मुंबई सोडणार नाही असा निर्धार मनोज जरांगेंनी केला आहे. त्यांनी सांगितले की, 'मराठा समजााच्या एकाही पोराने दगडफेक करायची नाही. समाजाला मान खाली घालावी लागेल असे एकही पाऊल उचलायचे नाही. त्यांनी अन्याय करू द्या, तुम्ही शांत राहा. मी आरक्षण मिळवून देणार, त्याशिवाय मुंबई सोडणार नाही. तुम्ही फक्त शांत राहा.'

मनोज जरांगेंनी पुढे सांगितले की, 'गोरगरिबांच्या आयुष्याचा प्रश्न असल्यामुळे मुंबईत आले आहे. सर्वजण त्यांची सेवा करत आहेत. त्याला गर्दी म्हणू नका. राज्यातील गरीब मराठ्यांना विनंती आहे, तुम्ही येताना काळजी घ्या. मुंबईत गाड्या सुरक्षित पार्क करा. रेल्वेने आझाद मैदानात या. वाशी, शिवडी, दुसऱ्या मैदानावर गाडी पार्क करा. तिथे पोलिसांचे संरक्षण आहे. तुम्ही ५ रुपयांत आझाद मैदानात या.', असे जरांगे म्हणाले.

तसंच, 'अन्नछत्र ज्यांनी सुरु केलं त्यातून पैसे मागू नका. गरिबांचं रक्त पिऊ नका. मी डायरेक मीडियात नावं घेईल. मी कोणाला बोलतोय हे त्याला कळतंय. तू लोकसभेत सुद्धा पैसे लोकांकडून घेतले. तुझे डिझेल खर्च झाले त्याचा हिशोब करतो आणि तुझे पैसे देतो. तू रेनकोट वाटले आणि कोणाकडून पैसे घेतले हे माहित आहे. तू दादा असशील का पादा असशील. महाराष्ट्राच्या मराठ्यांनी कोणालाही पैसा द्यायचा नाही.', असे मनोज जरांगेंनी आंदोलकांना स्पष्ट सांगितले.