Rupali Chakankar : माणसांच्या कळपात हिंस्त्र श्वापदे वावरतात; पुणे प्रकरणावरून रुपाली चाकणकर संतापल्या

सचिन जाधव, साम टीव्ही

पुण्यातील एसटी डेपोमध्ये २६ वर्षीय तरुणीवरील अत्याचाराच्या घटनेने खळबळ उडाली आहे. पुण्यातील घटनेनंतर महिला सुरक्षेचा प्रश्न ऐरणीवर आला आहे. या घटनेनंतर सर्वसामान्यांकडून संताप व्यक्त केला जात आहे. तरुणीवर अत्याचाराच्या घटनेची महिला आयोगाच्या अध्यक्षा रुपाली चाकणकर यांनी दखल घेतली आहे. माणसांच्या कळपात हिंस्त्र श्वापदे वावरतात, अशा शब्दात महिला आयोगाच्या अध्यक्षा रुपाली चाकणकर यांनी संताप व्यक्त केला आहे.

तरुणीवर अत्याचाराच्या घटनेने संपूर्ण महाराष्ट्र हादरलं आहे. पुण्यातील संतापजनक घटनेनंतर महिला आयोगाच्या अध्यक्षा रुपाली चाकणकर यांनी पुणे पोलीस आयुक्तांना फोन केला. रुपाली चाकणकर यांनी सर्व महिलांना सुरक्षेचा सल्ला दिला आहे. रुपाली चाकणकर यांनी महिलांना आवाहन करत म्हटलं की, 'तरुण मुली, महिलांनी सार्वजनिक जीवनात वावरताना अनोळखी व्यक्तींवर विश्वास ठेवू नये'.

'तुम्ही यंत्रणांची मदत घ्यावी. स्वतःची काळजी घ्यावी. माणसांच्या कळपात हिंस्त्र श्वापदे वावरतात. त्यांची संख्या दिवसेंदिवस वाढत आहे. आपण सतर्क रहावे, असा सल्ला आयोगाने दिला आहे. आता या प्रकरणात या पीडित मुलीच समुपदेशन आणि तसेच जलद तपासासाठी प्रशासनाला सूचना दिल्या असल्याची माहिती हाती आली आहे.

रुपाली चाकणकर म्हणाल्या, 'पुणे हे विद्येचे माहेरघर आहे. पुण्यात महाराष्ट्राच्या कानाकोपऱ्यातून विद्यार्थिनी शिक्षणासाठी येत असतात. पुण्यातील घटनेने वेदना होत आहेत. काल स्वारगेट आगारात ही घटना घडली. त्यानंतर तिने पोलिसांत तक्रार दिली. तक्रारीनंतर पोलिसांनी तातडीने तपास हाती घेतला. या भागातील संबंधित सीसीटीव्ही आणि आरोपीची ओळख यावरून पोलिसांची ८ पथके तपासावर आहेत. आरोपी पकडला जाईल, पण तरुणीची सुरक्षितता महत्वाची आहे. तिचं आयुष्य लाखमोलाचं आहे. मी सातत्याने पोलिसांच्या संपर्कात आहे. वर्दळीच्या भागात अशा घटना घडणे दुर्देवी आहे'.