Pune Dj Party : पबच्या पार्किंगमध्ये 'भाई'ची डीजे पार्टी; सोशल मीडियावर व्हिडिओ व्हायरल

पुण्यातील विमाननगर परिसरातून धक्कादायक घटना समोर आली आहे. परिसरातील थ्री मस्केटियर्स (Three Musketeers) पबच्या पार्किंगमध्ये शनिवारी मध्यरात्री एक डीजे बर्थडे पार्टी पार पडली, मात्र ही पार्टी नेहमीसारखी नव्हती. गुन्हेगारी पार्श्वभूमी असलेल्या काही व्यक्तींनी ही पार्टी आयोजित करून परिसरात प्रचंड गोंधळ घातला. विशेष म्हणजे, ही पार्टी विमानतळ पोलिस स्टेशनच्या अगदी जवळच, म्हणजे अक्षरशः हाकेच्या अंतरावरच पार पडली.

या पार्टीचा आयोजक फिरोज शेख, ज्याच्यावर सरकारी कर्मचाऱ्याच्या कामात अडथळा निर्माण करण्याचा गुन्हा आधीच नोंदवलेला आहे. त्यानेच या पार्टीचे आयोजन करून शंभरहून अधिक तरुणांना एकत्र केले. या गर्दीत गुन्हेगारी जगतातील इतरही काही बड्या नावांचे हजेरी लावल्याचे स्पष्ट झाले आहे. नुकताच 'मकोका' अंतर्गत येरवडा कारागृहातून मुक्त झालेला आकाश कंचिले देखील आपल्या टोळीसमवेत या पार्टीत सहभागी होता. ही पार्टी त्याच टोळीतील निखिल कांबळेच्या वाढदिवसानिमित्त आयोजित करण्यात आली होती, ज्याच्यावर येरवडा पोलिसांच्या ताब्यातून पळून जाण्याचा गंभीर गुन्हा दाखल आहे.

या डीजे पार्टीचे व्हिडिओज निखिलच्या पेनटरने थेट इंस्टाग्रामवर अपलोड केले आणि ते अल्पावधीतच सोशल मीडियावर व्हायरल झाले. व्हिडिओत मोठ्या आवाजात डीजे, गर्दीचा जल्लोष आणि फटाक्यांचा आवाज ऐकू येतो, तर काही क्लिप्समधून "भाई"ची दहशत दाखवण्याचा प्रयत्न असल्याचे स्पष्ट होते.

हैदोस घातलेल्या या पार्टीमुळे परिसरातील नागरिकांत भीतीचे वातावरण निर्माण झाले आहे. गुन्हेगारी पार्श्वभूमी असलेल्या व्यक्ती अशा प्रकारे खुलेआम गर्दी जमवून, गोंधळ घालून, पोलिसांच्या नजरेसमोर हे सर्व करतात, हे धक्कादायकच आहे. नागरिक आता विचारत आहेत की, पोलिसांनी या प्रकाराकडे डोळेझाक का केली? कायदा हातात घेणाऱ्यांवर कारवाई होणार का? सध्या सोशल मीडियावर या व्हिडिओच्या माध्यमातून ही घटना चांगलीच गाजत असून, पोलीस खात्याकडून कोणती प्रतिक्रिया येते याकडे सर्वांचे लक्ष लागले आहे.