Mumbai Municipal Corporation: राज्यात तिसरी आघाडी होणार? काँग्रेसच्या हाताला, आंबेडकरांची साथ?

राज्यात महापालिका निवडणुकांचं बिगूल वाजलंय. मुंबई महापालिकेसाठी भाजप-शिंदेसेना, मनसे आणि ठाकरेसेनेच्या युतीसाठी जोर बैठका सुरु आहेत. दरम्यान राज्यात तिसऱ्या आघाडीची चर्चा रंगलीय. आणि त्याला कारण ठरलंय काँग्रेसचे प्रदेशाध्यक्ष हर्षवर्धन सपकाळ यांनी गुप्तपणे घेतलेली प्रकाश आंबेडकरांची भेट. याच भेटीत काँग्रेसनं वंचितला युतीचा प्रस्ताव दिल्याची माहिती सुत्रांनी दिलीय. मात्र हा प्रस्ताव नेमका काय आहे.पाहूयात.

खरंतर विधानसभा निवडणुकीत महाविकास आघाडीला मतविभाजनाचा फटका बसला. त्यात वंचितच्या मतांचाही समावेश आहे. आता मुंबई महापालिकेसाठी ठाकरे बंधू एकत्र आल्यानं काँग्रेसनं स्वबळाचा नारा दिलाय. मात्र पुन्हा मतविभाजनाचा फटका बसू नये म्हणून वंचितसोबत चर्चा सुरु असल्याची माहिती सुत्रांनी दिलीय. मात्र हर्षवर्धन सपकाळ यांच्यासोबत भेट झाल्याचं मान्य करतानाच प्रकाश आंबेडकरांनी युतीचा निर्णय मुंबईची कमिटी घेईल, असं म्हणत युतीबाबत सूचक संकेत दिलेत.

खरंतर पंडित नेहरु आणि डॉ. बाबासाहेब आंबेडकर हे एकमेकांचे मोठे टीकाकार. मात्र त्यानंतरही देशासाठी दोघांनी एकाच मंत्रिमंडळात काम केलं. मात्र त्यांचे वारस असलेले राहुल गांधी आणि प्रकाश आंबेडकरांनी लोकसभेला युतीची अयशस्वी चर्चा केली. मात्र तेव्हा एकत्र येण्याची राहिलेली उणीव भरुन काढत नेहरुंचे नातू राहुल गांधींची काँग्रेस आणि बाबासाहेब आंबेडकरांचे नातू प्रकाश आंबेडकरांची वंचित बहुजन आघाडी मुंबई महापालिकेत भाजपला रोखण्यासाठी एकत्र येणार का? यावर महापालिकेतील विजयाचं गणित अवलंबून असणार आहे.