मोठी बातमी! शिवसेना महिला नेत्याला धमकीचं पत्र; राजकीय वर्तुळात खळबळ

मुंबई : राज्यात एकनाथ शिंदे गट आणि महाविकास आघाडी सरकार असा सत्तासंघर्ष सुरू असताना एक मोठी बातमी समोर आली आहे. मुंबई महापालिकेच्या माजी महापौर आणि शिवसेनेच्या नेत्या किशोरी पेडणेकर यांना धमकीचे पत्र आल्याची माहिती आहे. एका बंद लिफाफ्यातून पेडणेकर यांना हे पत्र आल्याची माहिती आहे. या पत्रात अश्लील शिवीगाळासह त्यांना जिवे मारण्याची धमकी देण्यात आली आहे. (Kishori Pednekar Latest News)

राज्यात एकीकडे सत्तासंघर्ष सुरू असताना, किशोरी पेडणेकर यांना जीवे मारण्याची धमकी देण्याचं पत्र आल्याने राजकीय वर्तुळात मोठी खळबळ उडाली आहे. धमकी देणाऱ्या व्यक्तीने पत्रात अश्लिल भाषा वापरली आहे. तसेच किशोरी पेडणेकर यांना जीवे मारण्याची धमकीही दिली आहे. याशिवाय अजित पवार यांच्या जिवावर उद्धव ठाकरे मुख्यमंत्री झाल्याचा उल्लेख पत्रात करण्यात आला आहे. विशेष बाब म्हणजे काही दिवसांपूर्वी याच व्यक्तीने पेडणेकरांना जीवे मारण्याची धमकी दिली होती.

राज्यातील राजकीय परिस्थिती

राज्यपालांनी ठाकरे सरकारला उद्याच (३० जूनला) बहुमत सिद्ध करण्याचे आदेश दिल्यानंतर राज्याचं राजकारण आता निर्णायक स्थितीत आलं आहे. शिवसेनेने (Shivsena) राज्यपालांच्या या निर्णयाविरोधात सुप्रीम कोर्टात याचिका दाखल केली होती, याच याचिकेवर आता सुप्रीम कोर्टाची सुनावणी आज (बुधवारी) संध्याकाळी ५ वाजता सुनावणी होणार आहे.

आजच दुपारी ३ वाजेपर्यंत सर्व कागदपत्र सादर करण्याचे आदेश शिवसेनेला सुप्रीम कोर्टाने दिले आहेत. शिवसेनेकडून वकिल अभिषेक मनू सिंघवी यांनी न्यायालयात युक्तिवाद केला आहे.

Edited By - Satish Daud