Maharashtra Cabinet Portfolio Delay : अजित पवारांसह 9 मंत्र्यांचा शपथविधी झाला; पण का रखडलंय खातेवाटप, कुठे अडलंय?

Mumbai News : राष्ट्रवादी काँग्रेसमधून बंडखोरी करत अजित पवार यांनी 2 जुलै रोजी शिंदे-फडणवीस सरकारसोबत हातमिळवणी केली. अजित पवारांनी राज्याच्या उपमुख्यमंत्रिपदाची आणि इतर 8 आमदारांनी मंत्रिपदांची शपथ घेतली. मात्र 10 दिवस उलटले तरी नवीन मंत्री खातेवाटपाच्या प्रतीक्षेत आहेत. मात्र हे खातेवाटप नेमकं कुठे अडलंय, असा प्रश्न आता सामान्य जनतेला पडला आहे.

अजित पवार गटाला वाटाघाटीत ठरलेली खाती मिळत नसल्याने खातेवाटप रखडले असल्याची माहिती सूत्रांकडून मिळत आहे. भाजपने त्यांना ज्या खात्याबाबत आश्वासन दिले होते ती खाती मिळत नसल्याने अस्वस्थता पाहायला मिळत आहे.

अजित पवार गटाला अर्थ , गृह, जलसंपदा ही खाती देण्यास शिंदे गट आणि भाजपकडून विरोध होत आहे. याऐवजी महसूल किंवा ऊर्जा खाते देण्याची तयारी शिंदे आणि भाजपने दर्शवली असल्याची माहिती समोर येत आहे.

अजित पवारांकडे अर्थखातं नको, अशी मागणी शिवसेनेच्या आमदारांकडून केली जात आहे, अशीही माहिती समोर येत आहे. कारण अजित पवार निधी देत नसल्याचा आरोप करत शिवसेनेच्या आमदारांनी वेगळी भूमिका घेत बंडखोरी केली होती. (Latest Marathi News)

सध्या अर्थ मंत्रालय उपमुख्यमंत्री देवेंद्र फडणवीस यांच्याकडे आहे. त्यामुळे फडणवीस एवढं मोठं खातं अजित पवारांसाठी सोडतील का हाही प्रश्न आहे. महाराष्ट्र मंत्रिमंडळात आता 29 मंत्री असून आणखी नवीन मंत्री त्यात सामील होण्याची शक्यता आहे. अशा परिस्थितीत शिंदे-फडणवीस-पवार सरकारसमोर खातेवाटपाचं मोठं आव्हान असणार आहे.