Crime: जमिनीच्या वादातून काका-पुण्यात तुंबळ हाणामारी, एकमेकांची डोकी फोडली; थरकाप उडवणारा VIDEO

Summary:

• कल्याणमध्ये जमिनीच्या वादातून तुंबळ मारहाण झाली.

• काका-पुतण्याने एकमेकांना बेदम मारहाण केली

• दोन्ही कुटुंबीयांनी एकमेकांवर दगडफेक देखील केली.

• या घटनेत एक जण गंभीर जखमी झाला तर तिघे किरकोळ जखमी झाले.

• घटनेचा CCTV व्हिडीओ सोशल मीडियावर व्हायरल होत आहे.

संघर्ष गांगुर्डे, कल्याण

कल्याणमध्ये जमिनीच्या वादातून काका-पुतण्यामध्ये तुंबळ हाणामारी झाल्याची घटना घडली. दोघांच्या कुटुंबियांना एकमेकांना मारहाण करत दगडफेक केली. त्याचसोबत लोखंडी हत्याराने वार देखील केले. ही घटना कल्याणनजीकच्या शहाडमध्ये घडली. या घटना सीसीटीव्हीमध्ये कैद झाली असून त्याचा व्हिडीओ समोर आला आहे. हा व्हिडीओ व्हायरल होत आहे. या प्रकरणी पोलिसांनी दोन्ही कुटुंबियांविरोधात गुन्हा दाखल करत तपास सुरू केला आहे.

मिळालेल्या माहितीनुसार, कल्याण पश्चिमेतील धाकटे शहाड कोळीवाडा परिसरात शनिवारी संध्याकाळी जमिनीच्या वादातून राडा झाला. या हाणामारीत पुतण्याला लोखंडी टोकदार हत्याराने मारहाण करण्यात आली. ही घटना परिसरातील सीसीटीव्ही कॅमेऱ्यात कैद झाली. या घटनेत ३ जण जखमी झाले असून विनोद दत्तात्रेय कोट हा गंभीर जखमी झाला आहे. विनोद हा हा आपल्या आई-वडिलांसोबत शहाड परिसरात राहत असून त्याचे काकांसोबत गेल्या काही वर्षांपासून वडिलोपार्जित जमिनीवरून वाद सुरु आहे.

शनिवारी सायंकाळी विनोदच्या घराच्या टेरेसवर त्याचे वडील दत्तात्रेय कोट हे साफसफाई करत होते. त्याच्या काकांना वाटले की टेरेसवर पाण्याची टाकी बसवण्याचे काम सुरू असल्याचा आरोप करत त्यांच्यात वाद सुरू झाला. या वादाचे रूपांतर काही क्षणातच हाणामारीत झाले. काका विष्णू कोट, काकू लीलाबाई कोट आणि त्यांचा मुलगा कुणाल कोट यांनी विनोद आणि त्याच्या आई-वडिलांना शिवीगाळ करत मारहाण केली.

या हाणामारीदरम्यान विनोदच्या काकांनी लोखंडी टोकदार हत्याराने त्याच्या डोक्यावर आणि डोळ्याजवळ वार केले. यानंतर दोन्ही कुटुंबात तुंबळ हाणामारी झाली. या हाणामारीमध्ये ३ जण किरकोळ जखमी झाले असून एक जण गंभीर जखमी झाला आहे. या प्रकरणी कल्याण खडकपाडा पोलिस ठाण्यामध्ये दोन्ही कुटुंबाविरोधात परस्पर गुन्हा दाखल करण्यात आला आहे. पोलिस सध्या या प्रकरणाचा तपास करत आहे.