Kalyan : कचऱ्यात पडलेले गुलाबजामुन खाण्याचा मोह; मुलीची प्रकृती बिघडली, कल्याण पूर्वेतील धक्कादायक घटना

संघर्ष गांगुर्डे
कल्याण : झोपडपट्टीत राहत असलेली मुलगी जवळ असलेल्या डम्पिंग ग्राउंडवर खेळता खेळता गेली. याठिकाणी गुलाबजामून पडलेले नजरेस पडले. हे गुलाबजामून पाहून तिला खाण्याचा मोह आवरला गेला नाही. यामुळे तिने कचऱ्यात पडलेले गुलाबजामून खाल्ले. यानंतर काही वेळातच या मुलीची प्रकृती बिघडली आहे. तिच्यावर सध्या रुग्णालयात उपचार सुरु आहेत.  

कल्याण पूर्वेतील सूचक नाका परिसरात टेकडीवर उभारलेले डम्पिंग ग्राउंड याठिकाणची हि धक्कादायक घटना आहे. दरम्यान उभारण्यात आलेले डम्पिंग ग्राउंड हे नागरिकांच्या जीवावर बेतू लागलं आहे. आधीच या डम्पिंगमुळे परिसरात असह्य दुर्गंधी पसरली आहे. यामुळे रहिवासी त्रस्त झाले आहेत. अनेकांना आजार जडत आहेत. मात्र आता परिस्थिती अधिक गंभीर झाली आहे. 

कचऱ्यातील गुलाबजामून खाल्ले 

डम्पिंग ग्राउंड असलेल्या भागातील झोपडपट्टीत राहणारी एक १४ वर्षीय मुलगी खेळता खेळता डम्पिंग परिसरात गेली. याठिकाणी तिला कचऱ्यात गुलाबजामुन पडलेले दिसले. हे पाहून तिला खाण्याचा मोह आवरला गेला नाही. हे गुलाबजामून उचलून तिने ते खाल्ले आणि काही वेळातच तिची प्रकृती बिघडली. यानंतर तातडीने तिला खाजगी रुग्णालयात दाखल करण्यात आलं असून उपचार सुरू आहेत.

डम्पिंग ग्राउंड हटविण्याची मागणी 

या धक्कादायक घटनेनंतर परिसरात संतापाची लाट उसळली आहे. नागरिकांनी डम्पिंग तातडीने हलवण्याची मागणी केली आहे. अन्यथा रस्त्यावर उतरून उग्र आंदोलन करू असा इशारा स्थानिक रहिवाशांनी दिला आहे. दरम्यान, पालिका प्रशासनाकडून मात्र या प्रकरणी कोणतेही ठोस पाऊल उचलले गेलेले नाही. त्यामुळे "कचऱ्याच्या ढिगाऱ्यात नागरिकांचा जीव धोक्यात का?" हा प्रश्न आता कल्याणकर विचारत आहेत.