Kalyan : कल्याण–डोंबिवलीत शिंदेंच्या शिवसेनेचा जल्लोष, ढोल ताशांच्या गजरात भरले उमेदवारीचे फॉर्म, युतीत जागा वाटपावरून तेरी भी चूप मेरी भी चूप

संघर्ष गांगुर्डे, कल्याण

राज्यात एकीकडे उमेदवारी न मिळाल्याने नाराजी नाट्य सुरु असून, कल्याण–डोंबिवलीत महायुतीतील अधिकृत उमेदवारांची नावे जाहीर होताच शहराच्या राजकारणात चांगलाच उत्साह संचारला आहे. भाजप आणि शिवसेना शिंदे गट यांच्या उमेदवारांनी ढोलताशांच्या गजरात, घोषणाबाजी आणि शक्तीप्रदर्शन करत निवडणूक प्रभाग कार्यालयांच्या दिशेने उमेदवारी अर्ज भरण्यास निघाले . मात्र पार्श्वभूमीवरही जागावाटपाबाबत दोन्ही पक्षांकडून अद्याप अधिकृत आकडे जाहीर करण्यात आलेले नसल्याचे चित्र दिसत आहे.

केडीएमसी निवडणुकीच्या उमेदवारी अर्ज भरण्याच्या अंतिम टप्प्यात महायुतीतील उमेदवारांनी आज मोठ्या उत्साहात अर्ज दाखल केले. अनेक प्रभागांमध्ये भाजप व शिवसेना (शिंदे गट) यांचे पॅनल असल्याने चारही उमेदवार एकत्र येत ढोल–ताशांच्या निनादात अर्ज भरण्यासाठी निघाल्याचे चित्र दिसून आले. डोंबिवली पूर्वेत शिवसेनेच्या मध्यवर्ती शाखेजवळ छत्रपती शिवाजी महाराजांच्या पुतळ्याला हार अर्पण करून उमेदवारांनी शक्तीप्रदर्शन करत निवडणूक कार्यालयाकडे कूच करताना पाहायला मिळत आहे.

कार्यकर्त्यांचा आनंद ,उत्साह, घोषणाबाजी आणि ढोल ताशाच्या गजरात फटाक्यांच्या आतषबाजीत करत शक्ती प्रदर्शन करत असल्याचं दिसून आले तर दुसरीकडे, काही भाजपचे उमेदवार शिवसेना कल्याण ग्रामीणचे आमदार राजेश मोरे यांच्यासोबत घोषणाबाजी करत अर्ज भरण्यासाठी जाताना दिसून आले.

यावेळी उमेदवारांचे आमदारांकडून स्वागत करण्यात आले. मात्र, माध्यमांनी आमदार राजेश मोरे यांना कल्याण–डोंबिवलीत नेमक्या किती जागा मिळाल्या, असा सवाल केला असता आमदार राजेश मोरे यांनी या मुद्द्यावर थेट उत्तर देणे टाळले. त्यामुळे भाजप व शिवसेना यांच्यात नेमके जागावाटप कसे झाले आणि कोणत्या प्रभागात कोण लढणार, याबाबत अद्याप गोपनीयता पाळली जात असल्याचे दिसत आहे.