Kalyan Crime: खळबळजनक! विद्यार्थ्याच्या अंगावर कार घातली, मारहाण करत अपहरणाचा प्रयत्न; घटना CCTV मध्ये कैद

अभिजित देशमुख, कल्याण

कल्याणमध्ये कॉलेजच्या विद्यार्थ्यांच्या अंगावर एका तरुणाने कार घालण्याचा प्रयत्न केला. इतकेच नाही तर कारमधून उतरून या विद्यार्थ्याला मारहाण केली. त्याचे अपहरण करण्याचा प्रयत्न केला. कल्याणच्या लोकग्राम परिसरात ही धक्कादायक घटना सोमवारी दुपारच्या सुमारास घडली. ही सर्व घटना सीसीटीव्ही कॅमेरात कैद झाली आहे. सुयश तिवारी असे या कार चालवणाऱ्या तरुणाचे नाव असून श्लोक सावंत असे महाविद्यालयीन विद्यार्थ्यांचे नाव आहे.

श्लोक सावंतच्या पालकांनी या घटनेबाबत संताप व्यक्त केला असून याप्रकरणी कोळसेवाडी पोलिस ठाण्यात तक्रार दाखल करण्यात आली आहे. महाराष्ट्रात मराठी माणूस सुरक्षित नाही, बाहेरचे येणार आम्हाला भर रस्त्यात मारणार आपण काय मार खाऊन घ्यायचा का? असा सवाल श्लोकची आई जुही सावंत यांनी केला आहे. तसेच आपल्या मुलाला मारहाण करणाऱ्यावर कठोर कारवाई करावी अशी मागणी देखील केली.

श्लोक सावंत कल्याण पूर्व लोकग्राम परिसरात राहतो. श्लोक बिर्ला कॉलेजमध्ये शिक्षण घेत आहे. काल दुपारच्या सुमारास श्लोक आपल्या मित्रासह दुचाकीने बिर्ला कॉलेजहून घरी जाण्यासाठी निघाला. यावेळी सुयश तिवारी नावाचा तरुण थार कारमधून त्याचा पाठलाग करत होता. श्लोक लोकग्राम परिसरात घरी जाण्यासाठी उतरला असता त्याचा पाठलाग करणाऱ्या सुयशने कार श्लोकच्या अंगावर घालण्याचा प्रयत्न केला. सुयश इथवरच थांबला नाही तर सुयश आणि त्याचा मित्र कामधून उतरले त्यांनी श्लोकला मारहाण करत त्याचे अपहरण करण्याचा प्रयत्न केला.

यावेळी श्लोकने आरडाओरड केला त्यामुळे सुयश आणि त्याचा मित्र तिथून निघून गेले. याप्रकरणी श्लोक आणि त्याच्या कुटुंबीयांनी कोळसेवाडी पोलिस ठाण्यात धाव घेत तक्रार नोंदवली आहे. आपल्या मुलाच्या अंगावर कार घालण्याचा प्रयत्न करत त्याला मारहाण करणाऱ्याविरोधात कठोर कारवाई करावी अशी मागणी श्लोकची आई जुही सावंतने केली. तर घडल्या प्रकरणाबाबत तीव्र संताप व्यक्त करत जुही सावंत यांनी महाराष्ट्रात मराठी माणूस सुरक्षित नाही, बाहेरून येऊन आपल्याला मारणार आपण काय मार खायचा का? अशावर कठोर कारवाई केले पाहिजे अशी मागणी केली.