Kalyan Assembly Election Voting: कल्याणच्या रस्त्यावर लिहिलेल्या ४ आकड्यामागचं रहस्य काय, मनसे आक्रमक

कल्याणमध्ये विधानसभा निवडणुकीसाठी सकाळपासून मतदान होत आहे. नागरिकांनी मतदान केंद्राबाहेर मतदान करण्यासाठी मोठी गर्दी केली आहे. अशामध्ये कल्याण ग्रामीण विधानसभा मतदारसंघात धक्कादायक प्रकार घडला आहे. लोकग्राम परिसरात मतदान केंद्राकडे जाणाऱ्या रस्त्यावर ठिक-ठिकाणी चार नंबरचा आकडा लिहण्यात आला आहे.

कल्याणमधील रस्त्यावर मराठीमध्ये ४ आकडा टाकण्यात आला आहे. मतदान केंद्राकडे जाणाऱ्या रस्त्यावर हा आकडा टाकण्यात आल्यामुळे खळबळ उडाली आहे. कल्याणमध्ये विधानसभा निवडणूक लढवणाऱ्या एका उमेदवाराची निशाणी चार नंबरवर आहे. त्यामुळे या उमेदवारांच्या कार्यकर्त्यांकडून रस्त्यावर अशापद्धतीने ४ आकडा टाकण्यात आला असल्याचा आरोप केला जात आहे. याप्रकरणी कल्याणमध्ये मनसे आक्रमक झाली आहे.यासंदर्भात मनसेने निवडणूक अधिकाऱ्यांकडे तक्रार दाखल केली असून चौकशी करत कारवाई करण्याची मागणी केली आहे.