Kalyan Accident : लग्नानंतर १५ वर्षांनी मूल झालं, रस्ता ओलांडताना मायलेकाचा मृत्यू; हृदय पिळवटून टाकणारी घटना

Kalyan Accident : कल्याणच्या लालचौकी परिसरामध्ये भीषण अपघात घडला आहे. यात एका ३ वर्षीय मुलासह आईचा जागीच मृत्यू झाला आहे. रस्ता ओलांडताना कचऱ्याच्या ट्रकने दोघांना धडक दिली. पोलिसांच्या माहितीनुसार, ते दोघे रस्त्याच्या दुभाजकावर उभे होते. दरम्यान कचऱ्याचा ट्रक वेगाने आला आणि त्यात दोघांचाही मृत्यू झाला. अपघाताच्या ठिकाणी लगेच गर्दी झाली. जमावाने दोघांनाही लगेच कल्याणच्या रुक्मिणीबाई हॉस्पिटलमध्ये दाखल केले. रुग्णालयात पोहोचल्यावर डॉक्टरांनी त्यांना मृत घोषित केले.

मृत बालकाचे नाव अंश (वय ३) आणि त्याच्या आईचे नाव निशा सोमेश्वर (३९) असे आहे. लालचौकी परिसरामध्ये काल (८ जानेवारी) सकाळी ११ च्या सुमारास हा भीषण अपघात झाला. रस्ता ओलांडताना कचऱ्याच्या ट्रकच्या धडकेमुळे त्या दोघांनाही आपला जीव गमवावा लागला. दरम्यान पोलिसांनी ट्रक चालकाला अटक केली असून पुढील तपास सुरु असल्याची माहिती समोर आली आहे.

अपघातामध्ये जीव गमावलेल्या मुलाचे वडील (अमित सोमेश्वर) हे बंगळुरुमधील एका आयटी कंपनीमध्ये कामाला आहेत. अपघात होण्याच्या एका दिवसापूर्वी मंगळवारी (७ जानेवारी) ते कामासाठी बंगळुरुला रवाना झाले असल्याचे माहिती पोलिसांना कुटुंबियांना दिली. ते लगेच मुंबईसाठी रवाना झाले असल्याचेही सांगितले. सोमेश्वर दांपत्याला लग्नानंतर बाळ होत नव्हते. १५ वर्ष प्रयत्न केल्यानंतर त्यांना मुलगा झाला होता, असे नातेवाईकांना पोलिसांना सांगितले.

अपघात झालेल्या ठिकाणी आधीपासूनच दुभाजक तुटलेला होता असे प्रत्यक्षदर्शींनी सांगितले. दरम्यान कल्याणचे माजी आमदार प्रकाश भोईर यांनी मनसे कार्यकत्यांसह अपघाताच्या परिसरात आंदोलन केले. रस्त्याचे बांधकाम नीट न केल्याने, रस्त्याची देखभाल न झाल्याने हा प्रसंग घडला असे त्यांनी म्हटले.