Mangrove Park : भारतातील पहिलं 'मँग्रोव्ह पार्क' लवकरच खुलं होणार; काय आहेत पार्काची वैशिष्ट्ये? वाचा

मुंबई आणि पर्यावरणप्रेमींसाठी एक आनंदाची बातमी आहे. मुंबईतील गोराई येथील 'मँग्रोव्ह पार्क' लवकरच सर्वसामान्य नागरिकांसाठी खुलं होणार आहे. या पार्कच्या माध्यमातून वन्यजीवन आणि विविध पक्ष्यांना जवळून पाहण्याची संधी पर्यटकांना मिळणार आहे.

मँग्रोव्ह पार्कात ७४० मीटर लांबीचा लाकडी पादचारी पूल तयार करण्यात आला आहे. हा पादचारी पूल संपूर्ण मँग्रोव्ह क्षेत्रातून जाणार आहे. पार्काच्या निर्मितीसाठी २०२१ साली मंजुरी देण्यात आली होती. हे पार्क 0.6675 हेक्टर क्षेत्रफळात उभारण्यात आलं आहे. यासाठी सुमारे ३३.४३ कोटी रुपयांचा खर्च करण्यात आला आहे. संपूर्ण प्रकल्प ८ हेक्टरच्या मँग्रोव्ह इकोसिस्टमचा एक भाग आहे.

महत्वाची बाब म्हणजे मँग्रोव्ह पार्क तयार करताना कोणत्याही प्रकारची झाडांची तोडफोड करण्यात आलेली नाही. पार्क उभारण्यासाठी इको-फ्रेंडली साहित्य आणि सौर उर्जेचा वापर करण्यात आला आहे. पार्कातील ८० टक्के वीज सौर उर्जेवर चालणारी आहे. वन अधिकारी दीपक खाडे यांनी सांगितलं की, पार्काचं काम अंतिम टप्प्यात आहे. पार्क लवकरच नागरिकांसाठी उघडण्यात येणार आहे.

पार्कची वैशिष्ट्ये:

या पार्कात २ मजली रूफटॉप रेस्टॉरंट, गिफ्ट शॉप, ग्रंथालय, ऑडिओ-विज्युअल रूम, माहिती केंद्र, १८ मीटर उंच पक्षी निरीक्षण टॉवर, मँग्रोव्ह जंगलातून जाणारा लाकडी पादचारी पूल, पूलाच्या शेवटी विशेष निसर्ग डेक पाहायला मिळणार आहे.

गोराईमधील पार्क सिंगापूरच्या मँग्रोव्ह पार्कच्या धर्तीवर तयार करण्यात आल्याचं सांगितलं जात आहे. या पार्कात मानवाला होणारे फायदे, मँग्रोव्हच्या (कांदळवन) विविध जाती, पर्यावरण साखळीतील महत्व या विषयी माहिती दिली जाणार आहे. नागरिकांना या पार्कात निसर्गरम्य पर्यटन करताना येणार आहे. तसेच इतर सुविधा देखील नागरिकांना मिळणार आहेत.