गुणरत्न सदावर्ते यांना ' या ' दोन प्रकरणांत अटकपूर्व जामीन

सोलापूर : सिल्व्हर ओक हिंसक आंदोलन प्रकरणी अडचणी सापडलेले आरोपी ॲड. गुणरत्न सदावर्ते (Gunratna Sadavarte) यांना सोलापुरात दाखल झालेल्या दोन वेगवेगळ्या गुन्ह्यात अटकपूर्व जामीन मंजूर झाला आहे. दोन समाजात तेढ निर्माण करणे, तसेच उच्च न्यायालयाच्या न्यायमूर्तींच्या निकालाबाबत टीका करुन बदनामी आणि जातीय द्वेष पसरवल्याचा आरोपाखाली सदावर्ते यांच्यावर गुन्हा दाखल (Police fir) करण्यात आला होता. मात्र, दोन्ही गुन्ह्यात अटकपूर्व जामीनावर (Pre arrest bail) मुक्तता करण्याचा आदेश सोलापूर येथील जिल्हा व सत्र न्यायालयाने दिला आहे. त्यामुळे सदावर्तेंना दिलासा मिळाला आहे.

ॲड. गुणरत्न सदावर्ते यांचे वकील संतोष न्हावकर यांनी दिलेल्या माहितीनुसार, सोलापुरामध्ये फौजदार चावडी पोलीस स्टेशनमध्ये सदावर्ते यांच्यावर दोन वेगवेगळे गुन्हे दाखल झाले होते. छावाचे अध्यक्ष योगेश पवार आणि सकल मराठा समाजाचे समन्वयक माऊली पवार यांनी सदावर्ते यांच्या विरोधात तक्रार दिली होती.

दोन समाजात तेढ निर्माण करणे तसेच उच्च न्यायालयाच्या न्यायमूर्तींच्या निकालाबाबत टीका करुन बदनामी आणि जातीय द्वेष पसरवल्याचा आरोप सदावर्ते यांच्यावर करण्यात आला होता. परंतु, आता दोन्ही गुन्ह्यात अटकपूर्व जामीनावर मुक्तता करण्याचा आदेश सोलापूर येथील जिल्हा व सत्र न्यायालयाने दिल्याने सदावर्तेंना दिलासा मिळाला आहे.

Edited By - Naresh Shende