Mumbai Student Fight: कांदिवलीत महाविद्यालयीन तरुणावर जीवघेणा हल्ला; समतानगर पोलीस ठाण्यात गुन्हा दाखल

संजय गडदे

Mumbai Crime News: महाविद्यालयातून घरी जाणाऱ्या युवकाला शिवीगाळ करून चाकूने वार करण्यात आल्याची घटना मुंबईच्या कांदिवली पूर्व परिसरात घडली आहे. चाकूने हल्ला करण्यात आलेला विद्यार्थी इयत्ता अकरावीमध्ये शिकत आहे. याप्रकरणी समता नगर पोलीस ठाण्यात दोघांविरोधात गुन्हा दाखल करण्यात आला आहे. आयुष आणि विशाल अशी हल्लेखोर तरुणांची नावे आहेत. (Latest Marathi News)

मिळालेल्या माहितीनुसार दोन दिवसांपूर्वी विद्यार्थी डान्सचा सराव करत असताना पीडित तरुण हा डान्स पाहत असताना त्याच महाविद्यालयातील आयुष या विद्यार्थ्याने त्याला शिवीगाळ करत धक्काबुक्की करून हाकलून दिले.

यानंतर पीडित तरुण आणि त्याचा भाऊ एचडीएफसी बँकेसमोर असलेला बस स्टॉप वर उभे असताना आयुष आणि त्याच्या साथीदारांनी पुन्हा शिवीगाळ आणि मारहाण करून त्यातील एका तरुणाने चाकूने वार केला. त्याच वेळी गस्तीवर असलेल्या पोलिसांनी (Police) तेथे पोहोचून पीडित तरुणाला कांदिवलीच्या शताब्दी रुग्णालयात (Hospital) उपचारासाठी दाखल केले.

याप्रकरणी पीडित तरुणाने समता नगर पोलीस ठाण्यात आयुष आणि विशाल विरोधात तक्रार दिली असून या तक्रारीनुसार समता नगर पोलिसांनी कलम 323, 324 आणि 504 नुसार गुन्हा दाखल करून पोलीस आरोपींचा शोध घेत आहेत.