वडिलांनीच केली आपल्या ७ वर्षीय बालिकेची निर्घृण हत्या; कारण ऐकाल तर व्हाल थक्क

ठाणे : मुंब्रा येथील संतोषनगर भागामध्ये अनिस मालदार खान (वय-३३) याने त्याची ७ वर्षीय मुलगी माहिरा हिचा गळा दाबून खून केल्याचा धक्कादायक प्रकार शनिवारी उघडकीस आला आहे. मुलीच्या हत्येनंतर अनिस याने देखील विष प्राशन केले आहे. कळवा या ठिकाणी असलेल्या छत्रपती शिवाजी महाराज रुग्णालयामध्ये त्याच्यावर उपचार सुरू असून त्याची प्रकृती स्थिर आहे. या प्रकरणी अनिस विरोधात मुंब्रा पोलीस ठाण्यात हत्येचा गुन्हा दाखल करण्यात आला आहे.

संतोष नगर परिसरात अनिस हा पत्नी आणि मुलगी माहिरासह राहत होता. शुक्रवारी रात्री अनिस आणि त्याच्या पत्नीमध्ये वाद झाला होता. त्यानंतर त्याची पत्नी मुलीला घेऊन शेजारी राहणाऱ्या नातेवाईकांकडे निघून गेली होती. अनिसही त्यांच्या पाठीमागे निघून गेला होता. तिथेही त्यांच्यात मोठा वाद झाला. त्यानंतर अनिसने माहिराला पळवून दत्तुवाडी येथील निर्जनस्थळी नेले होते.

हे देखील पहा-

पत्नीला मोबाईवर फोन करून माहिराचा शेवटचा आवाज ऐकून घे असे सांगत त्याने फोन बंद केला होता. त्यानंतर अनिसची पत्नी वारंवार त्याला संपर्क साधत होती. शनिवारी पहाटे अनिसने फोन सुरू केला आणि माहिराची हत्या केल्याचे पत्नीला सांगितला. या घटनेची माहिती मिळताच पोलिसांच्या पथकाने अनिसला घटनास्थळावरून ताब्यात घेतले आहे.

यावेळी त्याने विष प्राशन केले होते. पोलिसांनी तात्काळ त्याला कळवा येथील छत्रपती शिवाजी महाराज रुग्णालयात दाखल करण्यात आले आहे. माहिराच्या आईने दिलेल्या तक्रारीनुसार मुंब्रा पोलिसांनी अनिस विरोधात हत्येचा गुन्हा दाखल करण्यात आला आहे. या प्रकरणाचा तपास सुरू असल्याची माहिती पोलिसांनी दिली आहे.

Edited By- Digambar Jadhav