Virar Crime News: पेट्रोल बॅाम्ब हल्ला प्रकरणात आणखी एकाला अटक; विरार पोलिसांची मोठी कामगिरी

चेतन इंगळे

Mumbai Crime News: विरार येथे राहणारे आयर्नमॅन हार्दिक पाटील यांच्या घरावरील पेट्रोल बॅाम्ब हल्ला प्रकरणात आणखी एका आरोपीला अटक करण्यात विरार पोलिसांना यश आले आहे. अटक आरोपी हा कुख्यात गुंड व गोल्डन गॅंगचा मोरक्या चंद्रकांत खोपडे याचा मुलगा शैलेंद्र खोपडे असल्याची माहिती विरार पोलिसांनी दिली आहे. विरार पोलिसांनी त्याला शुक्रवारी संध्याकाळी अटक केली आहे.(Latest Virar News)

विरारचे आयर्नमॅन या किताबाचे मानकरी हार्दिक पाटीलच्या घरावर ४ मे रोजी काही अज्ञात इसमांकडून पेट्रोलचा बाँम्बचा हल्ला करण्यात आला होता. विरार पोलिसांनी या प्रकरणी जीवे मारण्याचा प्रयत्न, कट कारस्थान रचणे या कलमानव्ये गुन्हा दाखल केला होता. पोलिसांनी आतापर्यंत ८ आरोपींना अटक केली आहे. तर दोन आरोपी अद्यापही फरार होते. यातील आरोपी शैलेंद्र खोपडे हा मुंबईत असल्याची माहिता पोलिसांना मिळाली असता त्यांनी सापळा रचून त्याला मुंबईच्या भोईवाडा परिसरातून अटक केली.

विरार पोलिसांनी माहिती दिली की, शैलेंद्र याच्यावर मुंबईत काही गंभीर गुन्हे दाखल आहेत. शैलेंद्रने व्हॉट्अ‍ॅप कॉलवरून हार्दिक पाटील यांना जीवे मारण्याची धमकी दिली होती. शनिवारी वसई न्यायालयात हजर केल्यावर ४ जुलैपर्यंत पोलीस कोठडी देण्यात आल्याची माहिती विरारचे वरिष्ठ पोलीस निरीक्षक राजेंद्र कांबळे यांनी साम टिव्हीला दिली.

नेमकी काय होती घटना?

विरार येथील वर्तक वार्डच्या स्वागत बंगलो येथे ४ मेच्या रात्री पावणे बाराच्या दरम्यान हा हल्ला झालेला आहे. हिरव्या रंगाच्या एका दुचाकीवरुन येत जाणिवपूर्वक पेट्रोल भरलेल्या काचेच्या बॉटलमधील कोंबलेल्या कपड्याला आग लावुन ती पेटती बॉटल हार्दिक पाटील यांच्या राहत्या बंगल्यामधील गेटच्या आतील भागात फेकून हा हल्ला करण्यात आलेला होता. ही घटना सीसीटीव्ही कैद झाल्याने सर्व प्रकार उघडकीस आला होता.