Kishori Pednekar News: बॉडी बॅग खरेदी घोटाळा प्रकरण, किशोरी पेडणेकरांचा अटकपूर्व जामीन अर्ज कोर्टाने फेटाळला

सचिन गाड, मुंबई

Mumbai News: मुंबईच्या माजी महापौर किशोरी पेडणेकर (Mumbai Ex Mayor Kishori Pednekar) यांना मुंबई सत्र न्यायालयाकडून दिलासा नाहीच. किशोरी पेडणेकर यांचा अटकपूर्व जामीन अर्ज मुंबई सत्र न्यायालयाने (Bombay Sessions Court) फेटाळला. मुंबईत कोरोना काळामध्ये (Corona News) डेड बॉडी बॅग खरेदीचा भ्रष्टाचार झाला होता. याप्रकरणी किशोरी पेडणेकरांविरोधात गुन्हा दाखल करण्यात आला होता. गुन्हा दाखल झाल्यानंतर त्यांनी अटकपूर्व जामीन मिळावा यासाठी कोर्टात धाव घेतली होती. पण त्यांना दिलासा मिळाला नाही.

भाजप नेते किरीट सोमय्या यांनी काही दिवसांपूर्वी कोरोना काळात मुंबई महापालिकेत कोट्यवधी रुपयांचा घोटाळा झाल्याचा आरोप केला होता. किशोरी पेडणेकर यांच्यावर बॉडी बॅग खरेदीत घोटाळा केल्याचा आरोप करण्यात आला होता. याप्रकरणी किशोरी पेडणेकर यांच्याविरोधात मुंबईतील आग्रीपाडा पोलीस ठाण्यात गुन्हा दाखल करण्यात आला होता. किशोरी पेडणेकर यांच्यासोबतच बीएमसीच्या दोन अधिकाऱ्यांविरोधात देखील गुन्हा दाखल करण्यात आला होता.

मुंबईत मृत कोरोना रुग्णांना वाहून नेण्यासाठी वापरण्यात येणारी बॉडीबॅग २००० रुपयांऐवजी ६,८०० रुपयांना खरेदी केल्याचं ईडीने (ED) म्हटलं आहे. हे कंत्राट तत्कालीन महापौरांच्या सूचनेनुसार देण्यात आल्याचा आरोप ईडीने केला होता. कोविड काळात किशोरी पेडणेकर याच मुंबईच्या महापौर होत्या. त्यामुळे याप्रकरणी त्यांच्याविरोधात गुन्हा दाखल करण्यात आला होता.

बॉडी बॅग खरेदीत घोटाळा प्रकरणात किशोरी पेडणेकर यांच्या अडचणी वाढतच चालल्या आहेत. या प्रकरणात त्यांना अद्याप दिलासा मिळाला नाही. त्यातच कोर्टाने देखील त्यांचा अटकपूर्व जामीन अर्ज फेटाळला आहे. त्यामुळे त्यांच्या अडचणी आणखी वाढण्याची शक्यता व्यक्त केली जात आहे. या घोटाळा प्रकरणात ईडीने महापालिकेच्या काही अधिकाऱ्यांच्या घरी छापेमारी देखील केली होती.