PM Modi: मोदींनी सत्तेसाठी पुलवामा घटना घडवून आणली, काँग्रेस नेत्याचं वादग्रस्त ट्विट

नवी दिल्ली : काँग्रेस नेते उदित राज यांनी पंजाब येथील पंतप्रधान नरेंद्र मोदी यांच्या सुरक्षेतील त्रुटींबाबत एक वादग्रस्त ट्विट केले आहे. सत्तेच्या भूकेपोटी पंतप्रधान मोदींनी पुलवामा घटना घडवून आणल्याचे वादग्रस्त ट्विट उदित राज यांनी केले आहे. यावर भाजपनेही उदित राज यांना चोख प्रत्युत्तर दिले आहे (Congress Leader Udit Raj Controversial Tweet About PM Modi).

उदित राज यांनी काय ट्विट केलं?

काँग्रेस (Congress) नेते उदित राज यांनी ट्विट केले आहे की, पीएम मोदींच्या सुरक्षेच्या नावाखाली ढोंगी आणि पुजाऱ्यांचे दुकान सुरु झाले आहे.

पुलवामा घटना पीएम मोदींनी घडवून आणली - उदित राज

उदित राज यांनी पुढच्या ट्विटमध्ये लिहिले की, 'पंतप्रधान मोदींच्या नौटंकीमुळे आता पुष्टी झाली आहे की, सत्तेच्या भुकेसाठी पुलवामा घटना त्यांनी स्वतःच घडवून आणली होती.'

पंतप्रधानांच्या सुरक्षेतील त्रुटींवर उदित राज काय म्हणाले?

उदित राज यांनी झी मीडियाला सांगितले की, फिरोजपूरमध्ये जे काही घडले त्याला नौटंकी म्हटले जाईल. कारण पीएम मोदींवर कोणीही गोळीबार किंवा दगडफेक केली नाही, मग मी वाचलो असे ते का म्हणाले. विनाकारण या प्रकरणाला मोठं केलं जात आहे.

भाजपने प्रत्युत्तर दिले

काँग्रेस नेते उदित राज यांच्या टीकेवर जोरदार प्रत्युत्तर देत भाजपचे राष्ट्रीय प्रवक्ते गौरव भाटिया म्हणाले की, काँग्रेस नेते सोनिया गांधींच्या सांगण्यावरुन अशी विधाने करत आहेत. मी असेही म्हणू शकतो की राहुल गांधी चीनमधून पैसे घेतात. सोनिया गांधींना पाकिस्तानातून लोकशाही कमकुवत करण्याच्या सूचना मिळतात. पण पुराव्याशिवाय आम्ही कोणावरही निराधार आरोप करत नाही. उदित राज भाजपमध्ये असताना काँग्रेसवर आरोप करायचे, आता काँग्रेसमध्ये गेले तर भाजपवर आरोप करत आहेत.

Edited By - Nupur Uppal