Sharad Pawar Meets Cm Eknath Shinde: पवार-शिंदे यांच्या भेटीमागचं कारण काय? मुख्यमंत्र्यांनी स्पष्टच सांगितलं...

Sharad Pawar Meets Cm Eknath Shinde: राष्ट्रवादीचे सर्वेसर्वा शरद पवार यांनी आज मुख्यमंत्री एकनाथ शिंदे यांची वर्षा निवासस्थानी भेट घेतली. शिंदे राज्याचे मुख्यमंत्री झाल्यापासून पहिल्यांदा शरद पवार हे वर्षा निवासस्थानी त्यांच्या भेटीसाठी पोहोचले आहेत.

पवार आणि शिंदे यांच्या भेटीने राजकीय वर्तुळात उलटसुलट चर्चांना उधाण आलं आहे. आता याच चर्चांना मुख्यमंत्री शिंदे यांनी पूर्णविराम दिला आहे. त्यांनी या भेटीमागे नेमकं काय कारण आहे, याबाबत माहिती दिली आहे.

पवार-शिंदे भेटीमागचं नेमकं कारण काय?

शरद पवार यांच्या भेटीमागचं कारण सांगत मुख्यमंत्री एकनाथ शिंदे यांनी ही सदिच्छा भेट असल्याचं सांगितलं. ते म्हणाले आहेत की, ''या भेटीत कुठलीही राजकीय चर्चा झाली नाही. ही सदिच्छा भेट होती.'' मराठा मंदिर संस्थेला ७५ वर्ष पूर्ण झाली असून या कार्यक्रमाला उपस्थित राहण्यासाठी पवार यांनी निमंत्रण दिलं, असल्याचंही मुख्यमंत्र्यांनी सांगितलं आहे. (Latest Marathi News)

उद्धव ठाकरे परदेशात शरद पवार वर्षावर

मुख्यमंत्री शिंदे यांनी जरी या भेटीमागचं कारण स्पष्ट केलं असलं तरी याचे अद्यापही अनेक राजकीय अर्थ काढले जात आहेत. एकीकडे उद्धव ठाकरे परदेशात असतांना शरद पवार हे मुख्यमंत्री एकनाथ शिंदे यांच्या वर्षा निवासस्थानी त्यांच्या भेटीला गेले आहेत.

याबाबत बोलताना भाजप नेते राम कदम यांनी बोलतांना सांगितलं की, यातून वेगळा अर्थ काढण्याची गरज नाही. एका पक्षाचा प्रमुख राज्याच्या प्रमुखाच्या भेटीला गेला आहे. त्यामुळे यातून दुसरा काहीही अर्थ नाही.