CIDCO Lottery 2025: '३५ लाखांचं घरं ७५ लाखाला विकतात', सिडकोबाबत RTI मधून धक्कादायक माहिती उघड

Summary -

• सिडकोच्या घरांच्या किंमतींवरून आरटीआयमधून धक्कादायक माहिती समोर आली

• ३५ लाखांना तयार झालेले घर नागरिकांना ७५ लाखांपर्यंत विकले जाते

• नागरिकांनी सिडकोकडे १८ हजार घरं परत केली

• सिडकोकडून किंमती कमी करण्याबाबत कोणताही निर्णय घेण्यात आलेला नाही

विकास मिरगणे, नवी मुंबई

नवी मुंबईतील वाशी आणि खारघर परिसरात सिडकोच्या गृहनिर्माण योजनेतील घरांच्या अवाच्या सवा किंमतींमुळे नागरिकांमध्ये तीव्र नाराजी पसरली आहे. सिडकोच्या घरांच्या किंमतीबाबत आरटीआयमधून धक्कादायक माहिती उघड झाली आहे. 'जे घर ३५ लाखाला तयार होते ते घर हे ७४ लाख १० हजाराला विकतात,' असा आरोप करण्यात आला आहे. ही धक्कादायक बाब माहिती अधिकारातून समोर आल्याचे सांगितले जात आहे.

विशेष म्हणजे, आमदार, खासदार आणि सनदी अधिकाऱ्यांसाठी उभारल्या जाणाऱ्या प्रकल्पातील घरांच्या किंमती सर्वसामान्यांसाठीच्या घरांपेक्षा कमी असल्याचीही माहिती समोर आली आहे. परवडणाऱ्या घरांच्या नावाखाली सिडको १०० ते १२० टक्के नफा कमवत असल्याचा आरोप होत आहे. अनेक नागरिकांनी या महागड्या घरांकडे पाठ फिरवली असून प्रशासनाच्या भूमिकेकडे सर्वांचे लक्ष लागले आहे.

तसेच सिडकोने अजूनपर्यंत घराच्या किमती कमी होण्याबाबत कोणतीही ठोस भूमिका न घेतल्यामुळे अनेकांनी १८ हजार पेक्षा अधिक घर सिडकोकडे परत केली आहेत. त्यामुळे सिडकोचं घर ७५ लाखांपासून ते ९६ लाखांपर्यंत असल्यामुळे सर्वसामान्यांनी घरं कशी घ्यायची? असाच प्रश्न या निमित्ताने उपस्थित होत आहे. त्यामुळे माहितीच्या अधिकारात हे घर ३५ लाखांमध्ये मिळत असून त्याची किंमत ७५ लाखांपर्यंत सिडकोने केली आहे.

सिडकोच्या माध्यमातून स्वस्त घरं मिळत असल्यामुळे आपल्या हक्काचे घर खरेदी करण्याकडे अनेकांचा कल वाढला आहे. सिडकोच्या घरांची लॉटरी निघाली की मोठ्या प्रमाणात अर्ज केले जातात. पण सिडकोच्या घरांच्या किंमती वाढल्यामुळे नागरिकांचा घर खरेदीकडे कल कमी झाला आहे. घरांच्या किंमती कमी करण्यात याव्यात अशी मागणी नागरिकांकडून करण्यात येत आहे. पण अद्याप सिडकोकडून याबाबत काहीच निर्णय घेण्यात आला नाही.