'रोज मरे त्याला कोण रडे?' हाच मराठी शाळांबाबत शिवसेनेचा दृष्टीकाेन; भाजप आमदाराची टीका

सुशांत सावंत -

मुंबई : भाजप आमदार अमित साटम यांनी मुंबई महापालिकेच्या मराठी शाळांच्या मुद्दयावरुन शिवसेनेवर हल्लाबोल केला असून याबाबत त्यांनी मुख्यमंत्री उद्धव ठाकरेंना (Uddhav Thackeray) एक पत्र लिहलं आहे. आमदार साटम (Amit Satam) यांनी आपल्या पत्रात पहिल्यांदा शिवसेनेच्या वर्धापन दिनानिमित्त शुभेच्छा दिल्या आहेत त्यांनी लिहलं आहे. 'सर्वप्रथम आपणास हिंदूहृदय सम्राट बाळासाहेब ठाकरेंनी (Balasaheb Thackeray) मराठी माणसाच्या उद्धारासाठी स्थापन केलेल्या शिवसेनेच्या ५१ व्या वर्धापन दिनाच्या शुभेच्छा.

पण बाळासाहेबांच्या पश्चात महाराष्ट्राची मायबोली असलेल्या ‘मराठी’भाषेला आज उतरती कळा लागली आहे. खासकरून स्वत:ला मराठी रक्षक म्हणून घेणाऱ्या सत्ताधारी सेनेच्या ताब्यात असलेल्या मुंबई महानगर पालिकेच्या शाळांना (BMC ) टाळं ठोकण्यात येत असून 'रोज मरे त्याला कोण रडे?'अशा दृष्टीकोनातून सत्ताधारी मराठी शाळांकडे पाहत आहेत. याचा थेट परिणाम मराठी विद्यार्थ्यांच्या पटसंख्येतील घसरणीतून समोर येत असल्याचं साटम यांनी आपल्या पत्रात म्हटलं आहे.

तसंच याबाबतीत मागील वर्षी देखील पत्र (Letter) व्यवहार करुन सरकारचं लक्ष या विषयाकडे वेधण्याचा प्रयत्न केला होता. मात्र त्यावर न प्रतिक्रिया आली न कारवाई झाली नसल्याचं त्यांनी पत्रात लिहलं आहे. शिवाय २०१२ - १३ मध्ये ३८५ मराठी शाळा होत्या. ८१ हजार १२६ विद्यार्थी होते. २०२१-२२ मध्ये शाळा फक्त २७२ उरल्यात आणि ३४,०१४ विद्यार्थ्यी तिथं शिक्षण घेतायेत.

म्हणजेच गेल्या १० वर्षात ११० मराठी शाळांना टाळं लागलं आहे. ४७ हजार २०२ विद्यार्थ्यांवर शाळा सोडण्याची वेळ आल्याची माहिती समोर येत असल्याची आकडेवारी त्यांनी पत्राद्वारे दिली आहे.

तसंच एकीकडे सत्ताधारी सेना (Shivsena) मराठी अस्मितेच्या बाता करून सत्तेचा मेवा उपभोगत आहे आणि दुसऱ्या बाजूला मराठी शाळांची व विद्यार्थ्यांची संख्या ५० टक्क्यांनी घसरत असल्याची टीका त्यांनी सेनेवर केली आहे. तसंच मी आशा करतो की तुम्ही मराठी शाळांच्या परिस्थितीची गंभीर दखल घ्याल, जेणेकरून भविष्यात आपल्याला वर्धापन दिन हा “foundation day” म्हणून साजरा करण्याची वेळ येणार नाही. असा टोला देखील सेनेला लगावला आहे.

Edited By - Jagdish Patil