Mahrashtra Politics: ठाकरे गटाच्या बालेकिल्यात भाजपचा 'दांडिया'; नवरात्रोत्सवात रंगणार राजकीय गरबा

Maharashtra Political News:

आजपासून शारदीय नवरात्रौत्सव धूमधडाक्यात सुरू झाला आहे. रंगाची उधळण आणि दांडिया हे नेहमीच नवरात्रीचे आकर्षण ठरले आहे. यामध्ये राजकारणी तरी मागे कसे राहतील? निवडणुका डोळ्यासमोर असताना विविध पक्षांनी मुंबईत ठिकठिकाणी गरबाचे आयोजन केले आहे. (Latest Marathi News)

भाजपने तर ठाकरेंच्या मुंबईतील बालेकिल्ल्यातील मैदानं ही कुणाच्याही न कळत, गरब्यासाठी एक महिना आधिच बुकींग करून ठेवल्याची माहिती मिळते.

19 ऑक्टोबर ते 23 ऑक्टोबर रोजी ठाकरेंचा बालेकिल्ला समजल्या जाणाऱ्या अभ्युदय नगर काळाचौकी या मुंबईच्या भागात भाजपने दांडिया महोत्सव आयोजित केला आहे.

'उत्सव आदिशक्तीचा, जागर मराठी मनाचा' असे म्हणत शहीद भगतसिंग मैदानात हा दांडिया महोत्सव साजरा करण्यात येणार आहे. अर्थातच काळाचौकी हा शिवसेना ठाकरे गटाचा गड मानला जातो.

गेली कित्येक वर्ष या विधानसभा क्षेत्रात शिवसेनेचा उमेदवार निवडून येत आहेत. मात्र सत्तातरानंतर शिवसेनेत पडलेल्या फुटीचा फायदी घेत भाजपने आता शिवसेनेच्या या बाले किल्ल्यांमध्ये विविध कार्यक्रमांचे आयोजन करून हातपाय पसरण्यास सुरूवात केली आहे.

भाजपने सणांच्या पार्श्वभूमीवर विविध सांस्कृतिक कार्यक्रम, स्पर्धा, आयोजित करत येथील स्थानिक नागरिकांना आकर्षित करत आपल्याकडे वळवण्यास सुरूवात केलेली आहे. यावर ठाकरे आपला गड कसा राखून ठेवतात त्याकडे सर्वांचे लक्ष आहे.

वरळी पाठोपाठ काळाचौकी, दादर या भागांमध्ये जिथे शिवसेनेचं वर्चस्व आहे. या ठिकाणी गरब्या निमित्ताने भाजपने 'उत्सव आदिशक्तीचा, जागर मराठी मनाचा' या महोत्सवाचा आनंद घेण्याचं आवाहन भाजपकडून करण्यात आले आहे.

शुक्रवारी 19 ऑक्टोबरपासून हा दांडिया महोत्सव सुरू होणार असून 23 ऑक्टोबरपर्यंत चालणार असल्याचे सांगण्यात आले आहे. गेल्यावर्षी या दांडियाला अनेक सुपरस्टार अभिनेत्यांनी हजेरी लावली होती. यात रणवीर सिंहच्या उपस्थितीमुळे या कार्यक्रमाची चांगलीच चर्चा रंगली होती. यावर्षीच्या दांडीयाला नक्की कोणता सुपरस्टार येणार या बद्दल उत्सुकता नागरिकांमध्ये आहे.