MNS- Shivsena: ठाकरे बंधू आज करणार युतीची घोषणा, जागा वाटपाचा फॉर्म्युला ठरला; मनसे अन् शिवसेना किती जागांवर लढणार?

Summary:

• ठाकरे बंधू आज अधिकृतपणे मनसे–शिवसेना युतीची घोषणा करणार

• महापालिका निवडणुका एकत्र लढण्याचा ठाकरे बंधूंचा निर्णय

• जागावाटपाचा फॉर्म्युला जवळपास निश्चित

• ब्ल्यू सी हॉटेलमध्ये होणार पत्रकार परिषद

गिरीष कांबळे, मुंबई

महाराष्ट्र नवनिर्माण सेना आणि शिवसेना ठाकरे गट यांच्या युतीची चर्चा गेल्या अनेक दिवसांपासून सुरू होती. अखेर तो दिवस आज आला. आज राज ठाकरे आणि उद्धव ठाकरे एकत्र पत्रकार परिषद घेत युतीची घोषणा करणार आहेत. त्यांच्या पत्रकार परिषदेकडे सर्वांचे लक्ष लागले आहे. युतीसोबतच दोन्ही पक्षांच्या प्रमुख नेत्यांमध्ये जागावाटपासंदर्भात देखील चर्चा झाली. दोन्ही पक्षांमधील जागा वाटपाचा तिढा सुटला असून जागावाटपाचा फॉर्म्युला तयार झाला आहे.

राज्यातील महापालिका निवडणुका एकत्रित लढण्याचा निर्णय ठाकरे बंधुंनी घेतला आहे. त्यासाठी ते आज दुपारी १२ वाजता युतीची घोषणा करणार आहे. युतीची घोषणा करण्यापूर्वी दोघेही दादरच्या शिवाजी पार्कमधील बाळासाहेब ठाकरे यांच्या स्मृतीस्थळाचे दर्शन घेतील. त्यानंतर ते मुंबईतील ब्ल्यू सी हॉटेलमध्ये एकत्रित पत्रकार परिषद घेतील. या पत्रकार परिषदेत ते युतीची घोषणा करतील आणि जागावाटपाचा फॉर्म्युला आणि उमेदवारांची पहिली यादी जाहीर करतील अशी शक्यता वर्तवली जात आहे.

मनसे आणि शिवसेना युतीचा संभाव्य फॉर्म्युला समोर आला आहे. शिवसेना ठाकरे गट १४५ ते १५० जागांवर उमेदवार उभे करण्याची शक्यता आहे. तर ठाकरे गटाने मनसेला साधारणपणे ६५ ते ७० जागा सोडल्या आहेत. तर राष्ट्रवादी काँग्रेस शरद पवार गटाला १० ते १२ जागा सोडण्याचा निर्णय झाला असल्याची माहिती सुत्रांनी दिली आहे. आज युती आणि जागावाटपाबाबत अंतिम निर्णय जाहीर केला जाईल.

दरम्यान, ठाकरे बंधू युतीची घोषणा करणार असलेले ब्लू सी हॉटेल हे अत्यंत महत्वाचे ठिकाण आहे. याच ठिकाणी महाराष्ट्राच्या राजकारणाला बदलणाऱ्या अनेक गोष्टी घडल्या आहेत. २०१९ रोजी अमित शाह, उद्धव ठाकरे आणि देवेंद्र फडणवीस यांनी याच ब्लू सी हॉटेलमध्ये आम्ही अजूनही युतीत आहोत अशी घोषणा केली होती. मात्र निवडणुकीनंतर महाराष्ट्राच्या राजकारणात वेगळे चित्र पाहायला मिळाले. आज त्याच ब्लू सी हॉटलमध्ये तब्बल २० वर्षांनी ठाकरे बंधू एकत्रित पत्रकार परिषद घेऊन युती घोषित करणार आहेत.