'आपण यांना पाहिलं का?'; राणे विरुद्ध जाधव वाद पेटला, भास्कर जाधवांविरोधात मुंबईत बॅनरबाजी

निवृत्ती बाबर -

मुंबई: मुंबईतील माहीम परिसरात भाजपकडून भास्कर जाधव (MLA Bhaskar Jadhav) यांच्या विरोधात बॅनरबाजी करण्यात आली आहे. 'आपण यांना पाहीलात का ? शोधून आणणाऱ्याला ११ रू बक्षिस' अशा आशयाचे बॅनर लावण्यात आल्यामुळे ठाकरेंची शिवसेना विरुद्ध भाजपा (Shivsena Vs BJP) वाद पेटण्याची शक्यता नाकारता येत नाही.

शिवसेनेचे गुहागर मतदारसंघाचे आमदार भास्कर जाधव यांनी काही दिवसांपूर्वी केंद्रीय मंत्री नारायण राणे (Narayan Rane) यांच्या विरोधात आक्षेपार्ह शब्द वापरल्याने भाजप कार्यकर्ते चांगलेच आक्रमक झाले असून त्यांच्या विरोधात गुन्हा दाखल करण्यात आला आहे. जाधव यांच्या विधानामुळे कोकणातील राणे समर्थक देखील संतापले आहेत.

पाहा व्हिडीओ -

अशातच मंगळवारी रात्री जाधव यांच्या चिपळूणमधील घरावर हल्ला करण्याचा प्रयत्न झाल्याने मोठी खळबळ उडाली होती. शिवाय जाधव यांची सुरक्षा काढून घेतल्यानंतर हा हल्ला झाल्याचा आरोप ठाकरेंच्या शिवसेनेकडून केला जात आहे. दरम्यान जाधव विरुद्ध राणे हा वाद काही कमी होण्याचं दिसतं नाहीये.

कारण मुंबईत भाजपकडून आता भास्कर जाधव यांच्या विरोधात बॅनरबाजी करण्यात आली आहे. आपण यांना पाहीलात का ? शोधून आणणाऱ्याला ११ रू बक्षिस अशा आशयाचे बॅनर लावत जाधवांच्या वक्तव्याचा निषेध भाजपकडून करण्यात येत आहे.

मुंबईतील माहीम परिसरामध्ये हे बॅनर लावण्यात आले आहेत. भास्कर जाधव यांनी केंद्रीय मंत्री नारायण राणे यांच्या विरोधात केलेलं आक्षेपार्ह वक्तव्य चांगलेच अंगलट आल्याचं दिसतं आहे. जाधव यांच्या सुरक्षेत करण्यात आलेली कपात, घरावरती हल्ला, जाधवांविरोधात गुन्हा आणि आता ही बॅनरबाजी त्यामुळे भाजप जाधवांच्या विरोधात चांगलीच आक्रमक झाले असून त्याचे पडसाद कोकणातून मुंबईत देखील उमटायला सुरुवात झाल्याचं दिसून आले आहे.

बॅनर हटवले -

'आपण यांना पाहिलंत का ? शोधून आणणाऱ्यास अकरा रुपयांचे बक्षीस...!' अशा आशयाचे बॅनर शिवसेना नेते भास्कर जाधव यांच्या विरोधात काल रात्री मुंबईतील माहीम परिसरात लावण्यात आले होते. मात्र, कायदा-सुव्यवस्था चा प्रश्न निर्माण होऊ नये म्हणून पोलीस प्रशासनाने रात्रीचे हे बॅनर हटवल्याची माहिती समोर आली आहे.

Edited By - Jagdish Patil