Badlapur News: बदलापूरकरांचा जीवघेणा प्रवास, रेल्वे रुळाखालील भुयारी मार्गाचा स्लॅब तुटला; पाहा VIDEO

बदलापूरमधील नागरिक जीवघेणा प्रवास करत असल्याचे चित्र समोर आले आहे. बदलापूरमधील रेल्वे रुळाखालील भुयारी मार्गाचा स्लॅब तुटला आहे. त्यामुळे या ठिकाणी कधीही मोठी दुर्घटना होण्याची शक्यता आहे. असे असताना देखील याकडे रेल्वे प्रशासनाचे दुर्लक्ष आहे. याठिकाणावरून बदलापूरकर दुचाकी, रिक्षा आणि कारमधून प्रवास करत आहेत.

बदलापूर रेल्वे स्थानकाजवळील रेल्वे रुळाखालील भुयारी मार्गाच्या स्लॅबचा काही भाग तुटलाय. त्यातून या स्लॅबमध्ये वापरण्यात आलेल्या लोखंडी सळ्या म्हणजेच गज बाहेर दिसू लागले आहेत. पावसाळ्यात अनेकदा त्या स्लॅबमधून पाणी गळती होते. या भुयारी मार्गातून पूर्व आणि पश्चिमेकडे येण्या जाण्याचा मार्ग आहे.

शिवाय या भुयारी मार्गावर असलेल्या रेल्वे रुळांवरुन काही मिनिटांच्या अंतराने अनेक लोकल आणि लांब पल्ल्याच्या गाड्या धावत असतात. यामुळे भुयारी मार्ग कमकुवत होण्याची शक्यता आहे. या भुयारी मार्गाच्या दुरुस्तीकडे रेल्वे प्रशासनाने लक्ष दिलं नाही तर एखादी मोठी दुर्घटना होण्याची शक्यता नाकारता येत नाही.