पुण्यात नवले पुलाजवळ पुन्हा भीषण अपघात: कंटेनरच्या केबिनचा अक्षरशः चुराडा

पुणे : मुंबई- बंगळुरू महामार्गावर नऱ्हे याठिकाणी नवले पुल परिसरामध्ये अपघातांची मालिका ही कायम सुरूच आहे. एका कंटेनर चालकाचे वाहनावरील नियंत्रण सुटल्यामुळे महामार्गावरच दुभाजकाला धडकून कंटेनर पलटी झाला आहे. यामध्ये चालक जखमी झाला आहे. ही घटना आज सकाळी ९ वाजेच्या दरम्यान घडली आहे.

याविषयी मिळालेली माहिती अशी की, साताराकडून मुंबईच्या दिशेने निघालेला हा कंटेनर नवले पुल परिसरात आल्यानंतर कंटेनर चालकाचे वाहनावर असलेले नियंत्रण सुटले आणि महामार्गावरच रस्त्याच्या मधोमध असणाऱ्या दुभाजकाला धडकून कंटेनर पलटी झाला आहे. अपघात एवढा भीषण होता की, चालकाच्या केबिनचा अक्षरशः चुराडा झाला आहे.

हे देखील पहा-

यामध्ये चालक जखमी झाला असून त्याला जवळच्या मोरया हॉस्पिटलमध्ये उपचाराकरिता दाखल करण्यात आले आहे. अपघाताचे वृत्त मिळताच सिंहगड रस्ता वाहतूक विभागाचे वरिष्ठ पोलीस निरीक्षक उदयसिंह शिंगाडे, सहायक पोलिस निरीक्षक प्रशांत कणसे हे पोलीस कर्मचाऱ्यांसह घटनास्थळी तातडीने पोहचले आहे. अग्निशमन दलाच्या जवानांनी जखमी चालकाला बाहेर काढले आहे.

क्रेनच्या साहाय्याने अपघातग्रस्त वाहन काढण्याचे काम सुरू असून महामार्गावर वाहनांच्या मोठ्या प्रमाणात रांगा लागले आहेत. सकाळी ९ वाजेच्या दरम्यान कामांवर जाणाऱ्यांची लगबग सुरू असते. यावेळी नवले पुल परिसरात महामार्गावर रोज गर्दी असते. मात्र, आज महामार्गावर अपघात घडला त्यावेळी आजूबाजूला कोणतेही वाहन नसल्याने मोठा अनर्थ टळला आहे. अपघातग्रस्त कंटेनर ची अवस्था पाहिल्यानंतर अपघाताची भीषणता लक्षात येत आहे.

Edited By- Digambar Jadhav