अंधेरी रेल्वे स्थानकावर वृद्ध व्यक्तीकडून मुलीचं धर्मांतर? व्हायरल व्हिडिओमागचं सत्य काय? पोलिस म्हणाले...

मुंबईतील अंधेरी रेल्वे स्टेशनवरील एका व्हिडिओमुळे परिसरात खळबळ उडाली होती. ज्येष्ठ व्यक्ती भरदिवसा स्टेशनवर एका मुलीचं धर्मांतर करत असल्याचा आरोप काही जणांनी केला. याचा व्हिडिओही समाजमाध्यमांमध्ये व्हायरल झाला होता. या व्हिडिओमुळे वातावरण देखील तापले होते. 'अंधेरी स्टेशन लव्ह जिहाद अन् धर्मांतराचा नवा अड्डा झालाय', असं काहींनी म्हटलं आहे. या व्हिडिओवर काही नेटकऱ्यांनी संताप आणि नाराजी व्यक्त केली. दरम्यान, या प्रकरणाचा पोलीस तपास करण्यात आला. पोलीस तपासात आरोप आणि दावे खोटे असल्याचं समोर आलंय.

व्हायरल व्हिडिओत नेमकं काय होतं?

व्हायरल व्हिडिओ अंधेरी रेल्वे स्टेशनचा असल्याचं समोर आलं आहे. अंधेरी रेल्वे स्टेशनवर एक मुलगी बसलेली असते. तिच्या समोर एक वृद्ध पुरूष उभा आहे. मुलगी हात जोडून आणि डोळे मिटून बसली आहे. तर, वयस्कर व्यक्ती मंत्रसदृश्य उच्चार करत असल्याचं दिसून येत आहे. यानंतर काही जणांनी त्या व्यक्तीला जाब विचारला. तसेच काही प्रश्न विचारले. याचा व्हिडिओ सोशल मीडियात व्हायरल होत आहे.

व्हिडिओ व्हायरल होताच अंधेरी जीआरपी आणि आरपीएफ पोलिसांनी तात्काळ घटनास्थळी धाव घेत तपासाला सुरूवात केली. व्हायरल व्हिडिओमधील दोन्ही व्यक्तींचा शोध घेण्यात आला. तसेच त्यांना ताब्यात घेऊन त्यांची चौकशी करण्यात आली. त्या दोघांचा जबाब नोंदवण्यात आला. या जबाबात मुलीनं धक्कादायक माहिती दिली.

वयस्कर व्यक्तीकडून धर्मांतर करण्यात आला नसून, जपानी मेडिटेशनचा प्रकार असल्याचं संबंधित मुलीकडून सांगण्यात आलं आहे. व्हिडिओमध्ये दिसणारे दोन्हीही व्यक्ती हिंदूधर्मीय आहेत. त्यामुळे व्हिडिओ व्हायरल करणाऱ्यांकडून चुकीची माहिती पसरवण्यात येत आहे, असं मुलगी आणि वृद्ध व्यक्तीने सांगितलं. ते दोघेही एकमेकांचे परिचयाचे आहेत. संबंधित व्हिडिओ डिलीट करण्यासाठी मुलीने पोलिसांकडे विनंती केली आहे.