Ambernath Politics: अंबरनाथच्या राजकारणाची अख्ख्या महाराष्ट्रात चर्चा, भाजपची खेळी त्यांच्यावरच उलटली, शिंदेंनी डाव टाकला, काय घडलं?

नगरपालिका, नगरपरिषदांच्या निवडणुकीचा निकालानंतर अंबरनाथ चर्चेत आलंय. आधी काँग्रेसशी युती करून सत्तेचं गणित मांडणाऱ्या भाजपला शिंदे गटानं मोठा धक्का दिलाय. काँग्रेसचे 10 नगरसेवक फोडणाऱ्या भाजपला खो देत राष्ट्रवादी आणि शिवसेना तेथे सत्ता स्थापन करणार आहे. अंबरनाथ या ठिकाणी शिवसेना आणि राष्ट्रवादी पक्ष मिळून उपनगराध्यक्ष केला जाणार आहे. अजित पवार गटाचे उपनगराध्यक्ष पदासाठी सदा मामा पाटील यांचे नाव निश्चित करण्यात आले आहे.

यामुळे काँग्रेसच्या फुटीर नगरसेवकांसोबत सत्ता स्थापन करण्याचे स्वप्न पाहणाऱ्या भाजपला खासदार श्रीकांत शिंदे यांनी मोठा धक्का दिल्याची चर्चा सुरू आहे. अंबरनाथ नगरपरिषदेमध्ये शिवसेनेचे २७ नगरसेवक निवडून आलेत. त्यांना आता अजित पवार गट राष्ट्रवादीने चार नगरसेवकांनी पाठिंबा दिलाय. त्याचसोबत एका अपक्षानेही त्यांना पाठिंबा दिला त्यामुळे एकूण ३२ नगरसेवकांचा गट स्थापन करण्यात आलाय. दरम्यान अंबरनाथमध्ये भाजपनं केलेल्या अनोख्या युतीमुळं विरोधकांनी त्यांच्यावर टीकेची झोड उठवली होती. तेथील राजकारणाची चर्चा अख्ख्या महाराष्ट्रात होतेय. मात्र शिंदे गटानं भाजपची खेळी उलथवून लावत त्यांना सत्तेपासून दूर केलंय.

दुसरीकडे अंबरनाथमध्ये भाजपचे एकूण १६ नगरसेवक निवडून आले होते तर शिवसेनेचे २७ नगरसेवक निवडून आले होते. शिवसेनेला सत्तेपासून दूर ठेवण्यासाठी भाजपने आधी काँग्रेससोबत आघाडी केली. मात्र वरिष्ठांकडून त्यावर नाराजी व्यक्त केल्यानंतर भाजपने काँग्रेसचे १० नगरसेवक फोडले. त्यानंतर अजित पवारांच्या राष्ट्रवादीसोबत आघाडी करत सत्ता स्थापनेचा दावा केला होता. इतकेच नाही तर, भाजप काँग्रेसचे नगरसेवकांना आपल्या पक्षात घेत सत्ता मिळवण्यावरून खूप आशावादी होती.

मात्र श्रीकांत शिंदेंची खेळीनं भाजपचा डाव उलथला गेलाय. शिवसेनेचे सर्व नगरसेवक ठाण्यातील आनंद आश्रम या ठिकाणी गोळा झाले. त्यानंतर श्रीकांत शिंदे यांनी शिवसेनेचे २७, अजितदादांचे ४ आणि एका अपक्षाच्या मदतीने त्यांनी सत्ता स्थापनेचा दावा केलाय. त्यांनी तसे पत्र जिल्हाधिकाऱ्यांना दिलंय.

सोमवारी १२ जानेवारी रोजी होणाऱ्या उपनगराध्यक्ष पदाच्या निवडणुकीत भाजपाचा उपनगराध्यक्ष बसेन अशी चर्चा होती. मात्र आज श्रीकांत शिंदेंनी खेळलेल्या राजकीय खेळणीनं भाजपला चीपट केलंय. राष्ट्रवादीच्या ४ नगरसेवकांनी शिवसेनेला समर्थन दिलं आहे.