मुंबईच्या तलावात बुडणाऱ्या तरुणीला वाचवायला गेला तरूण; दोघांचाही बुडून मृत्यू

मुंबई : विहार तलावामध्ये पोहायला गेलेल्या आरे कॉलनीमधील चार जणांपैकी एक तरुणी आणि एक पुरुष बुडल्याची दुर्दैवी घटना समोर आली आहे. १८ वर्षीय तरुणी तलावात पोहण्यासाठी गेली असता ती बुडाली ती बुडत असल्याचं दिसताच तिला वाचवण्यासाठी तिच्यासोबत असलेला संदीप पाण्यात उतरला मात्र, ते दोघेही तलावात बुडाले. संदीप काशिनाथ टबाले वय वर्ष ४० तर १८ वर्षीय एक तरुणीचा या तलावात बुडून मृत्यू झालेल्यांची नावे आहेत.

काल संध्याकाळी पाच वाजताच्या दरम्यान आरे कॉलनीमधील आंबावाडी येथे राहणारे संदीप टबाले, सागर टबाले, यश नार्वेकर आणि ही तरुणी पोहण्यासाठी आरे कॉलनी, पवईच्या मध्यावर असलेल्या विहार तलावात गेले होते. मात्र पोहत असताना पाण्याचा अंदाज न आल्याने संदीप आणि तरुणी पाण्यात बुडाले. या वेळी इतर दोघांनी याची माहिती आरे पोलिसांना (Police) दिली.

पोलिसांनी अग्निशमन दल आणि मुलुंड पोलिसांच्या मदतीने त्यांचा शोध सुरू केला असता आज सकाळी या दोघांचे मृतदेह हाती लागले आहे. या प्रकरणी मुलुंड पोलिसांनी आकस्मित मृत्यूची नोंद केली असून मुलुंड पोलीस (Mulund Police) पुढील तपास करीत आहेत.

Edited By - Jagdish Patil