Mumbai Crime : मुंबईत घुसखोरी; ३ बांगलादेशींना अटक, अंधेरी पोलीस-ATS ची कारवाई

संजय गडदे

Mumbai Crime News : मुंबईत अवैधरित्या वास्तव्यास असलेल्या तीन बांगलादेशी नागरिकांना अटक करण्यात आली. मुंबई पोलिसांचे दहशतवादविरोधी पथक आणि अंधेरी पोलिसांनी संयुक्तरित्या ही कारवाई केली. दोन्ही तपास यंत्रणांना ही माहिती गुप्त खबऱ्यांमार्फत मिळाली होती. या माहितीची खात्री पटल्यानंतर ही धडक कारवाई केली.

मिळालेल्या माहितीनुसार, मुंबईच्या अंधेरी पोलीस ठाण्याच्या हद्दीतील ३ वेगवेगळ्या परिसरांत वास्तव्य करणाऱ्या ३ बांगलादेशी नागरिकांना अटक करण्यात आली आहे. मुंबई पोलिसांचे दहशतवादविरोधी पथक आणि अंधेरी पोलीस ठाण्याच्या अधिकाऱ्यांनी ही कारवाई केली. हे तिन्ही बांगलादेशी नागरिक भारतात अवैध मार्गाने घुसले होते. (Latest Marathi News)

मागील अनेक वर्षंपासून ते या परिसरांत वास्तव्य करत होते. अब्दुल आजाद अब्दुल हाय फारूक, मोहम्मद शरीफ रफिक गाझी आणि अख्तर अब्दुल रहमान शहा अशी अटक करण्यात आलेल्या तीन बांगलादेशी घुसखोरांची नावे आहेत. (Mumbai Police)

अंधेरी पोलीस ठाण्याच्या हद्दीत तीन बांगलादेशी नागरिक अवैधपणे मागील अनेक वर्षंपासून वास्तव्यास असल्याची माहिती खबऱ्यांकडून अंधेरी पोलीस ठाण्याला मिळाली होती. यानंतर मिळालेल्या माहितीची खात्री करून अंधेरी पोलीस ठाणे आणि दहशतवाद विरोधी पथकाच्या तुकडीने तीन बांगलादेशींना मोगरापाडा, कोल डोंगरी आणि जे बी नगर मेट्रो स्थानक परिसरातून ताब्यात घेतले. यातील दोन आरोपींना न्यायालयीन कोठडी सुनावण्यात आली असून एक आरोपी पोलीस कोठडीमध्ये आहे, अशी माहिती पोलीस निरीक्षक राजकुमार हसबे यांनी दिली.

Edited By - Nandkumar Joshi