Washim : अवैध दारूबंदीसाठी महिलांचा एल्गार; पाण्याच्या टाकीवर चढून महिलांचे शोले स्टाईल आंदोलन

मनोज जयस्वाल 
वाशीम : गावात सुरू असलेली अवैध दारू विक्रीचा धंदा वाढत चालला आहे. यामुळे गावात तंटे वाढले असून दारूबंदी करण्याच्या मागणीसाठी महिला आक्रमक झाल्याचे पाहण्यास मिळाले. अनेकदा मागणी केल्यानंतर देखील दारूबंदी होत असल्याने अखेर आज महिलांनी गावातील टाकीवर चढून शोले स्टाईल आंदोलन केले. या आंदोलनामुळे आता प्रशासन काय भूमिका घेणार हे पाहणे महत्वाचे ठरणार आहे. 

वाशिमच्या वारला, टनका, सोनगव्हाण, पांगरखेडा याठिकाणी मोठ्या प्रमाणात अवैधपणे दारू विक्री करण्यात येत असते. टनका, सोनगव्हाण, पांगरखेडा गावात अवैध दारू विक्रेत्यांनी नुसता धुमाकूळ घातला असून अवैध दारू विक्रीमुळे कित्येक महिलांचे घर उध्वस्त झाले आहेत. त्यांच्या संसाराची राख रांगोळी झाली आहे. गावात देखील वाद वाढलेले पाहण्यास मिळत आहेत. यामुळे अनेक दिवसांपासून दारू बंदी करण्याची मागणी करण्यात येत होती. 

पोलीस प्रशासनाचे दुर्लक्ष 

दरम्यान गावात सहजपणे पहाटेपासूनच तळीरामांना दारू मिळत असल्यामुळे गावाचे वातावरण दूषित झाले आहे. गावांची शांतता व सुव्यवस्था भंग पावली आहे. अनेक महिला तसेच शाळकरी मुली या अवैध दारू विक्रीमुळे त्रस्त झाल्या आहेत. त्यामुळे गावातील अवैध दारू विक्री बंद करण्यात यावी; अशी मागणी गावातील महिलांकडून करण्यात येत होती. मात्र पोलीस प्रशासनाकडून याकडे दुर्लक्ष करण्यात येत होते. 

तीव्र आंदोलनाचा इशारा 

गावात सुरु असलेली अवैद्य दारू विक्री बंद करण्याच्या मागणीसाठी वज्रदेही महिला विकास संघाच्या महिला थेट वारला गावातील पाण्याच्या टाकीवर चढून पोलीस प्रशासनाच्या विरोधात शोले स्टाईल आंदोलन केले. महिलांनी पोलीस प्रशासनाविरोधात जोरदार घोषणाबाजी करत दारूबंदी करण्याची मागणी केली आहे. दारू बंदी करा अन्यथा त्यापेक्षा तीव्र आंदोलन करण्याचा इशारा या महिलांनी दिला.