Washim News : एकाच रात्री पाच ठिकाणी घरफोडी; वनोजा गावात चोरट्यांनी केला हात साफ

मनोज जयस्वाल 
वाशीम : एकीकडे विधानसभेची रणधुमाळी सुरु आहे. निवडणुकीसाठी पोलिसांचा फौजफाटा कार्यरत आहे. याचा फायदा घेत चोरटयांनी वाशिमच्या वनोजा गावात चोरी केल्याचे समोर आले आहे. एकाच रात्री गावात पाच ठिकाणी घरफोडी करत ऐवज लंपास केला आहे.  

राज्यात विधानसभा निवडणुकीची रणधुमाळी सुरु आहे. विधानसभेसाठी उद्या मतदान प्रक्रिया पार पडणार असून यासाठी मतदान केंद्रांवर (Police) पोलीस बंदोबस्त तैनात करण्यात आला आहे. पोलिस बंदोबस्तात व्यस्त असताना (Washim News) वाशिमच्या मंगरुळपिर तालुक्यातील वनोजा गावात चोरट्यांनी एकाच रात्री पाच घरांमध्ये घरफोडी करून मोठा मुद्देमाल लंपास केला आहे. अर्थात गटात देखील निवडणुकीचा फिवर असल्याने बहुतांश गावात शुकशुकाट पाहण्यास मिळत आहे. याच संधीचा फायदा चोरटयांनी घेतला आहे.  

दुचाकीही लांबविली 

गावात घरफोडी झाल्याचा प्रकार आज सकाळी उघडकीस आला. घरातून ऐवज लंपास करण्यासोबतच चोरट्यांनी एक दुचाकीची देखील लंपास केल्याची घटना घडली आहे. एकाच रात्री सर्व घटना घडल्याने गावकऱ्यांमध्ये भीतीचे वातावरण निर्माण झाले आहे. या प्रकरणी पोलिसात तक्रार देण्यात आली असून पोलिसांकडून तपस सुरु करण्यात आला आहे.