Wardha News: घराचे स्वप्न भंगले; महिला कर्मचाऱ्यास २६ लाखांनी गंडविले

चेतन व्यास

वर्धा : नवीन घर खरेदी करण्यासाठी वारंवार पैशांची मागणी करुन महावितरण कंपनीत कार्यरत महिलेचा आरोपी दलालाने विश्वासघात केला. या दरम्‍यान तब्बल २५ लाख ९० हजार रुपयांनी महिलेला गंडविले. यामुळे महिला कर्मचाऱ्याचे घराचे स्वप्न भंगले असून त्यांनी सेवाग्राम पोलिसात तक्रार दाखल केली. पोलिसांनी (Police) आरोपीविरुद्ध गुन्हा दाखल केल्याची माहिती दिली. (Tajya Batmya)

सुरेखा कृष्णा गजभे (वय ४४, रा. उगले लेआऊट सेवाग्राम) या महावितरण (Mahavitaran) सेलू विभागात नोकरी करतात. मे २०२० मध्ये त्या नोकरीवर असताना सुनिल रामचंद्र शेंडे हा आला. त्याने मी तुमच्या पतीचा मित्र आहे. आम्ही सोबत काम केले आहे. माझ्या लहान भावाच्या लग्नाची पत्रिका द्यायला आलो; असे सांगून विश्वास दर्शविला. दोघांचीही ओळख झाली.

घराचे बांधकामही दाखविले

१० एप्रिल २०२१ मध्ये सुनिल शेंडे हा सुरेखाच्या घरी गेला आणि घर खरेदी करायचे आहे का? असे सांगून तीन घर विक्रीला आहे असे सांगितले. तसेच काही दिवसांनी वर्धा येथील स्वागत कॉलनीतील घराचे सुरु असलेले बांधकाम दाखविले. सुरेखा यांना ते बांधकाम आवडल्याने घर खरेदी करायचे असल्याचे सांगितले. सुनिलने फोन करुन ३० लाख रुपयांची व्यवस्था करा; घर खरेदी करु असे सांगितले.

धनादेशाद्वारे दिली रक्‍कम

सांगितल्‍यानुसार सुरेखा गजभे हिने सुनिल शेंडे याला ३ मे २०२१ ते १९ जून २०२१ या कालावधीत तब्बल २५ लाख ९० हजार ४७ रुपयांची रक्कम धनादेशाद्वारे दिली. मात्र, सुनिलने घर खरेदी करुन दिले नाही. सुरेखाने एक तर घर खरेदी करुन दे किंवा पैसे परत दे, असे म्हटले. मात्र, सुनिलने पैसे देण्यास टाळाटाळ केली. सुनिलने घर खरेदी करुन देण्याचे नावे फसवणूक केल्याने सुरेखाने याबाबतची तक्रार सेवाग्राम पोलिसात दिली. पुढील तपास पोलिस करीत आहे.