Ulhasnagar Crime : मिरची स्प्रे फवारत रिक्षा चालकाला बेदम मारहाण; उल्हासनगर रेल्वे स्थानक परिसरातील घटना

उल्हासनगर : उल्हासनगर रेल्वे स्थानक परिसरात एका रिक्षा चालकावर मिरची स्प्रे फवारून जबर मारहाण केल्याची धक्कादायक घटना घडली आहे. मारहाणीत सदर रिक्षा चालक जखमी झाला असून त्यांच्यावर रुग्णालयात उपचार सुरु आहेत. तसेच या प्रकरणी रिक्षा चालकाने दिलेल्या फिर्यादीवरून पोलिसात तक्रार दाखल करण्यात आली आहे. 

उल्हासनगरच्या कॅम्प ४ मधील मराठा विभागात वास्तव्यास असलेले गणेश सकपाळ असे जखमी रिक्षा चालकाचे नाव आहे. दरम्यान सोमवारी पहाटे ते स्थानकाजवळ रिक्षा रांगेत थांबले होते. याच वेळी अचानक डोळ्यांत मिरची स्प्रे जाण्यामुळे त्यांनी जवळच्या इडली विक्रेत्याकडे याबाबत चौकशी केली. तेव्हा हृदय करमचंदानी नावाचा तरुण पुढे येत मिरची स्प्रे मीच मारला; असे म्हणत वाद घालू लागला. दोघांमधील हा वाद वाढतच गेला. 

मारहाण करत झाला फरार 

काही क्षणातच त्याने सकपाळ यांच्या डोळ्यांत मिरची फवारली आणि हातातील स्टील कड्याने डोक्यावर व तोंडावर जोरदार मारहाण केली. या घटनेनंतर परिसरात गोंधळ उडाला. इतर रिक्षा चालकांनी मदतीस धाव घेतली असता, त्यांच्यावरही मिरची स्प्रे फवारण्यात आला. यानंतर हृदय करमचंदानी हा घटनास्थळावरून फरार झाला आहे. गंभीर जखमी सकपाळ यांच्यावर उल्हासनगरच्या मध्यवर्ती रुग्णालयात उपचार सुरू आहेत. स्थानिक पोलिसांनी गुन्हा नोंदवून तपास सुरू केला आहे.

७० वर्षीय वृद्ध सासूला सुनेकडून मारहाण
लातूर : लातूरच्या शिरूर अनंतपाळ तालुक्यातील सुमठाणा गावात घरगुती शेतीच्या वादावरून एका वृद्ध महिलेला सुनेकडूनच मारहाण करतानाचा व्हिडिओ सोशल मीडियावर व्हायरल होतो. या व्हिडिओत त्या वृद्ध महिलेचे केस ओढत तिला फरफटकांना आणि लाथा बुक्क्यांनी मारताना दिसत आहे. दरम्यान या प्रकरणी अद्याप कुठलाही गुन्हा दाखल नाही.