Mumbai-Nashik Highway: मुंबई-नाशिक महामार्गावर अपघाताचा थरार, भरधाव कार संरक्षण भिंतीला धडकली नंतर..; दोघांचा मृत्यू

Summary -

• मुंबई–नाशिक महामार्गावर भरधाव कारचा भीषण अपघात

• कार संरक्षण भिंतीला धडकल्यानंतर डिव्हायडरवर आदळून चक्काचूर झाली

• दोन तरुणांचा जागीच मृत्यू झाला तर एक जण गंभीर जखमी झाला

फैय्याज शेख, शहापूर

मुंबई-नाशिक महामार्गावर भीषण अपघाताची घटना घडली. भरधाव कारने आधी संरक्षण भिंतीला धडक दिली. नंतर ही कार ४० ते ५० फूटांवर जाऊन डिव्हायडरवर आदळली. हा अपघात इतका भीषण होता की कारमधील दोघांचा जागीच मृत्यू धाला. तर एक जण गंभीर जखमी झाला आहे. जखमीवर रुग्णालयात उपचार सुरू आहेत. पोलिस सध्या या अपघाताचा तपास करत आहेत.

मिळालेल्या माहितीनुसार, आज सकाळी मुंबई-नाशिक आग्रा महामार्गावर शहापूरजवळ अपघात झाला. चालकाचा कारवरील ताबा सुटला आणि कार संरक्षण भिंतीला धडकली. त्यानंतर ही कार डिव्हायडरवर आदळली. या अपघातामध्ये मयुरेश विनोद चौधरी (वय- २९ वर्षे) रा. तानसा) आणि जयेश किसन शेंडे (वय २५ वर्षे, रा. उंबरखाड) या दोघांचा जागीच मृत्यू झाला. तर हर्षल पांडूरंग जाधव (वय २९ वर्षे) रा. पेंढरघोळ) हा तरुण गंभीर जखमी झाला असून त्याला उपचारासाठी रुग्णालयात दाखल केले आहे. या अपघातामध्ये कारचा चक्काचूर झाला.

दरम्यान, नवी मुंबईत कार अपघातामध्ये दोन तरुणांचा मृत्यू झाला. हा अपघात जेएनपीटी- पनवेल मार्गावर झाला. सहा तरुण कारने रात्री जेवणासाठी हॉटेलवर जात होते त्यावेळी ही घटना घडली होती. भरधाव कारने कंटेनरला धडक दिली. या अपघातामध्ये दोघांचा जागीच मृत्यू तर चौघे जण जखमी झाले होते. जखमी तरुणांवर रुग्णालयात उपचार सुरू आहेत. कार चालकाविरोधात पोलिसांनी गुन्हा दाखल केला.