भंडारा जिल्ह्यात नेटवर्क असलेले झाड !

अभिजित घोरमारे

भंडारा : भंडारा जिल्ह्यातील लाखनी तालुक्यातील जेवनाळा गावात सकाळी 11 वाजले कि विद्यार्थ्यांची एकच घाई सुरु होते. गावामध्ये नेटवर्क झाड म्हणून गावात फेमस असलेल्या कडूनिंबाच्या झाडावर चढून ऑनलाइन अभ्यास करतात. जेवनाळा गावात मोबाईल टॉवर असून देखील घरी मोबाईलला रेंज मिळत नाही. Tree with network in Bhandara district

गावात टॉवर असतांना सुद्धा मोबाइल वर साधी रेंज मिळत नसल्यामुळे टॉवर जवळ 200 मिटर अंतरावर असलेल्या कडुनिंबाच्या झाडावर इंटरनेटची स्पीड चांगली मिळत असल्याने गावातील युवक व विद्यार्थी इंटरनेटसाठी या कडूनिंबाच्या झाडाजवळ आश्रय घेतात. नेटसर्फिंग करण्यासाठी जेवनाळा गावातील युवकांची या कडूनिंबाच्या झाडाजवळ सतत मांदियाळी राहत असल्याने गावात हे झाड 'नेटवर्क झाड' म्हणून प्रसिद्ध झाले आहे.

जेवनाळा गावात मोबाइल टॉवर असून ही कित्येक वर्षांपासून मोबाइल रेंजची समस्या आहे. गावात साधा कॉल ही लागत नसल्याने तिथे इंटरनेट ची काय बिसाद! ही परिस्थिती उद्भवली आहे. यात मात्र विद्यार्थ्यांची घुसमट होत असून शाळा ऑफलाइन तर शिक्षण ऑनलाइन झाल्याने, ऑनलाइन शिक्षणासाठी जेवनाळा गावातील विद्यार्थ्यांना व नेटसर्फिंग करणाऱ्या युवकांना झाडावरची कसरत करावी लागत आहे!

पाऊस आला तर क्लासला उपस्थित राहता येत नाही. आता तर चक्क पावसाळा लागलाय त्यामुळे आता बिकट परिस्थिती सुरु झाल्याचे गावातील युवक सांगतायत. आपल्या पाल्याची अभ्यासासाठी सुरु असलेल्या धडपडीने पालक ही गहिवरले असून प्रशासनाने नेटवर्क ची समस्या सोडवण्याची मागणी पालकांकडून केली जात आहे.

कोरोनामुळे दीड वर्ष झाले शाळा बंद आहे. मात्र आजची पिढी घडवण्यासाठी शाळेकडून विद्यार्थी हित लक्षात घेता ऑनलाइन शिक्षण सुरु ठेवले आहे. असे असतानासुद्धा ग्रामीण भागात मोबाइलला साधे नेटवर्क मिळत नसल्यामुळे विद्यार्थ्यांना जीव मुठीत घेऊन ऑनलाइन शिक्षण घ्यावे लागत आहे. त्यामुळे शासन प्रशासनाकडून त्वरित या घटनेची दखल घेणे तितकेच गरजेचे आहे. कारण प्रश्न शेवटी विद्यार्थ्यांचा आहे.

Edited By : Krushnarav Sathe